CAB. XIII

1Lhig da dy chooilley annym ve biallagh da ny pooaraghyn syrjey; son cha vel pooar ayn agh veih Jee: ta ny pooaraghyn t’ayn er nyn bointeil liorish Jee. 2Quoi-erbee er-y-fa shen ta shassoo seose noi’n phooar, t’eh shassoo seose noi oardagh Yee: as nee adsyn ta shassoo seose tayrn kerraghey orroo hene. 3Son cha vel fir-reill oyr aggle da obbraghyn mie, agh da drogh obbraghyn. Nailt eisht ve gyn aggle jeh’n phooar? jean shen ta mie, as yiow moylley er y hon: 4Son shirveishagh Yee eh dhyt’s son foays. Agh my t’ou jannoo shen ta olk, gow aggle; son cha vel eh gymmyrkey yn cliwe ayns fardail: son sharvaant Yee eh, fer ta coamrit lesh pooar dy ghoaill cooilleen ersyn ta jannoo olk. 5Shen-y-fa shegin diu ve biallagh, cha nee ny-lomarcan son aggle roish kerraghey, agh myrgeddin er graih cooinsheanse. 6Son er y choontey shoh ta shiu myrgeddin geeck keesh: son shirveishee Yee ad, tendeil dy kinjagh er yn eer red shoh. 7Eeck-jee er-y-fa shen da dy chooilley unnane e chair; keesh dauesyn ta keesh cair, custom dauesyn ta custom; aggle dauesyn ta aggle; ooashley dauesyn ta ooashley cair. 8Ny bee-jee fo lhiastynys son nhee erbee da dooinney erbee, agh dy choyrt graih yn derrey yeh da’n jeh elley: son t’eshyn ta graihagh er fer elley, er lhieeney yn leigh. 9Son shoh t’er ny ghra, Cha brish oo poosey, Cha jean oo dunverys, Cha jean oo geid, Cha n’ymmyrk oo feanish foalsey, Cha der oo saynt; as my ta anney erbee elley, te ayns focklyn giarey goit stiagh fo’n raa shoh, ta shen, Ver oo graih da dty naboo myr dhyt hene. 10Cha vel graih jannoo aggair da e naboo; shen-y-fa she graih lhieeney yn leigh. 11As shen, liorish coyrt tastey da’n traa, dy vel eh nish ard traa dy ghoostey ass cadley: son nish ta nyn saualtys ny sniessey na ve tra ren shin hoshiaght credjal. 12Ta’n oie foddey ceaut, ta’n laa er-gerrey: lhig dooin er-y-fa shen tilgey ersooyl obbraghyn y dorraghys, as lhig dooin cur orrin eïlley yn toilshey. 13Lhig dooin gimmeeaght dy onneragh myr ayns y laa: cha nee ayns rouanys as meshtyrys, cha nee ayns cloie as reaïd, cha nee ayns streeu as troo: 14Agh cur-jee erriu yn Chiarn Yeesey Creest, as ny gow-jee kiarail erbee son yn eill, dy chooilleeney yn taynt eck.