CAB. XIV

1Eshyn ta annoon ’sy chredjue gow-jee rish, agh cha nee gys jengleyrys dooyteilagh. 2Son ta fer credjal dy vod eh gee dy chooilley nhee: fer elley ta faase, t’eh gee lossyreeyn. 3Ny lhig dasyn ta gee, beg y hoiaghey jehsyn nagh vel gee; as ny lhig dasyn nagh vel gee, eshyn y vriwnys ta gee: son ta Jee er ghoaill rish. 4Quoi oo hene ta briwnys sharvaant ghooinney elley? liorish [briwnys] e vainshter hene t’eh shassoo ny tuittym: Dy jarroo, bee eh er ny chummal seose: son ta Jee abyl dy niartaghey eh. 5Ta un dooinney soiaghey jeh un laa erskyn laa elley: ta fer elley goaill dy chooilley laa co-laik. Lhig da dy chooilley ghooinney geddyn slane shickyrys ayns e chree hene. 6Eshyn ta freaylley’n laa, t’eh freaylley eh gys y Chiarn; as eshyn nagh vel freaylley’n laa, gys y Chiarn cha vel eh dy reaylley eh. Eshyn ta gee, t’eh gee gys y Chiarn, son t’eh coyrt booise da Jee; as eshyn nagh vel gee, gys y Chiarn cha vel eh gee, as t’eh coyrt booise da Jee. 7Son cha vel veg j’in bio da hene, as cha vel dooinney erbee geddyn baase da hene. 8Son edyr shin ve bio, ta shin bio gys y Chiarn; as edyr shin ve marroo, ta shin marroo gys y Chiarn: Shen-y-fa edyr shin ve bio ny marroo, ta shin lesh y Chiarn. 9Son er-y-fa shoh hooar Creest chammah baase, as dirree eh, as vio-ee eh reesht, dy voddagh eh ve Chiarn chammah ny bio as ny merriu. 10Agh cre’n-fa t’ou briwnys dty vraar? ny cre’n-fa t’ou soiaghey beg jeh dty vraar? Son shegin dooin ooilley shassoo kiongoyrt rish stoyl-briwnys Chreest. 11Son te scruit, Myr ta mee bio, ta’n Chiarn dy ghra, shegin da dy chooilley ghlioon croymmey hym’s, as shegin da dy chooilley hengey goaill-rish gys Jee. 12Myr shen eisht shegin dooin ooilley coontey choyrt j’in hene gys Jee. 13Ny lhig dooin er-y-fa shen briwnys y cheilley ny sodjey: agh kiarail y ghoaill, nagh der dooinney erbee ribbey, ny oyr tuittym ayns raad e vraar. 14Ta fys as shickyrys aym ayns y Chiarn Yeesey, nagh vel nhee erbee neu-ghlen jeh hene; agh dasyn er-lesh ta nhee erbee neu-ghlen, da shoh te neu-ghlen. 15Agh my ta [cooinsheanse] dty vraar seaghnit kyndagh rish dty vee, ayns shoh cha vel oo dy dty ymmyrkey oo hene ayns graih. Ny stroie eshyn lesh dty vee, er e hon hooar Creest baase. 16Ny lhig da’n mie euish eisht ve loayrit dy olk jeh. 17Son cha nee bee ny jough reeriaght Yee, agh cairys, as shee, as boggey ayns y Spyrryd Noo. 18Son t’eshyn ta shirveish Creest ayns ny reddyn shoh, ayns foayr rish Jee, as jeh goo mie mastey deiney. 19Lhig dooin er-y-fa shen geiyrt da ny reddyn ta jannoo son shee, as lioroo oddys shin niartaghey y cheilley ’sy chredjue. 20Er coontey bee ny cur mow obbyr Yee. Ta dy chooilley nhee dy jarroo glen: agh te olk da’n dooinney shen ta gee lesh oyr scammylt. 21Cha vel eh mie dy ee feill, ny dy iu feeyn, ny nhee erbee elley liorish ta dty vraar ayns dangeyr tuittym, ny dy ve agglit veih, ny lhag ’sy chredjue. 22Vel credjue ayd? lhig da ve ayd dhyt hene kionfenish Yee. S’maynrey yn dooinney nagh vel deyrey eh-hene ayns shen ny t’eh dy lowal. 23As t’eshyn ta fo dooyt, er ny gheyrey my t’eh gee, er-y-fa nagh vel eh gee ayns credjue: son cre-erbee nagh vel veih credjue, te peccah.