CAB. XVI

1Ta mee moylley hiu Phebe nyn shuyr, ee ta ny sharvaant da’n agglish ta ec Cenchrea. 2Dy gow shiu r’ee ayns y Chiarn, myr te cooie da nooghyn, as dy gooin shiu lh’ee ayns cooish erbee vees feme eck erriu: son t’ee er choyrt oltagh-bea da ymmodee, as dou hene myrgeddin. 3Bannee-jee Priscilla as Aquila my cho-laboree ayns Creest Yeesey: 4(Ren, dy hauail my vioys, coyrt ayns dangeyr ny mwannallyn oc hene: dauesyn cha nee mish my-lomarcan ta coyrt booise, agh myrgeddin ooilley kialteenyn ny Hashoonee). 5Bannee-jee myrgeddin ny Creesteenyn t’ayns y thie oc. Bannee-jee my charrey graihagh Epenetus, yn chied-vess dy Chreest ayns Achaia. 6Bannee-jee Moirrey, t’er ve feer dooie dooin. 7Bannee-jee Andronicus as Junia my gheiney-mooinjerey as my heshaghyn-pryssoonee, ta jeh goo ooasle mastey ny ostyllyn, va myrgeddin ayns Creest roym’s. 8Bannee-jee Amplias shynney lhiam ayns y Chiarn. 9Bannee-jee Urban m’er-coonee ayns Creest, as Stachys shynney lhiam. 10Bannee-jee Apelles firrinagh ayns Creest. Bannee-jee adsyn ta jeh lught-thie Aristobulus. 11Bannee-jee Herodion my ghooinney-mooinjerey. Bannee-jee adsyn ta jeh lught-thie Narcissus, ta ayns y Chiarn. 12Bannee-jee Tryphena as Tryphosa, ta laboraght ayns y Chiarn. Bannee-jee Persis ennoil, ren lane shirveish ayns obbyr y Chiarn. 13Bannee-jee Rufus reiht liorish y Chiarn, as y voir echeysyn as aym’s. 14Bannee-jee Asyncritus, Phlegon, Hermas, Patrobas, [Hermes], as ny braaraghyn ta mâroo. 15Bannee-jee Philologus, as Julia, Nereus, as e huyr, as Olympas, as ooilley ny nooghyn ta mâroo. 16Bannee-jee y cheilley lesh paag chasherick. Ta kialteenyn Chreest dy nyn mannaghey. 17Nish ta mee guee erriu, vraaraghyn, gow-jee tastey jeusyn ta kyndagh jeh anvea as scammyltyn, ta noi’n chredjue ta shiuish er n’ynsaghey; as chea-jee voue. 18Son cha vel nyn lheid shirveish nyn Jiarn Yeesey Creest, agh nyn molg hene; as liorish goan aalin as glare vrynneragh t’ad molley creeaghyn yn vooinjer ôney. 19Son ta’n viallys euish er ny imraa mastey dy chooilley ghooinney. Ta mee er-y-fa shen goaill boggey er y lieh eu: agh ny-yeih baillym shiu ve tastagh gys shen ny ta mie, as ôney mychione olk. 20As nee’n Jee dy hee dy gerrit Noid-ny-hanmey y vroo fo nyn gassyn. Grayse nyn Jiarn Yeesey Creest dy row mêriu. Amen. 21Ta Timotheus my heshey-obbree, as Lucius, as Jason, as Sosipater my gheiney-mooinjerey bannaghey shiu. 22Ta mish Tertius, ren shoh y scrieu, bannaghey shiu ayns y Chiarn. 23Ta Gaius ren oltagh-bea y choyrt dooys, as da’n slane agglish, dy vannaghey shiu. Ta Erastus stiurt yn ard-valley dy nyn mannaghey, as Quartus ta braar Creestee. 24Grayse nyn Jiarn Yeesey Creest dy row mêriu ooilley. Amen. 25Nish dasyn ta pooaral dy niartaghey shiu cordail rish yn sushtal aym’s, as preacheil Yeesey Creest, (cordail rish soilshaghey yn folliaght, v’er ny cheiltyn er dy hoshiaght y theihll, 26Agh ta nish jeant cronnal, as liorish scriptyryn ny phadeyryn, cordail rish sarey yn Jee dy bragh farraghtyn, er ny hoilshaghey da dy chooilley ashoon son biallys da’n chredjue). 27Gys yn ynrycan Jee creeney dy row gloyr trooid Yeesey Creest son dy bragh. Amen.