CAB. II

1Shen-y-fa t’ou fegooish leshtal, O ghooinney, quoi-erbee oo hene ta briwnys: son ayns ny t’ou briwnys fer elley, t’ou deyrey oo hene; son uss ta briwnys, t’ou jannoo ny reddyn cheddin. 2Agh ta fys ain dy vel briwnys Yee cordail rish yn irriney, n’oï adsyn ta cur rish lheid ny reddyn. 3As vel oo smooinaghtyn shoh, O ghooinney, ta briwnys adsyn ta jannoo lheid ny reddyn, as oo hene cur rish ny reddyn cheddin, dy scaap oo briwnys Yee? 4Ny vel oo soiaghey beg jeh berchys e vieys, as e veenid, as surranse-foddey, gyn toiggal dy vel mieys Yee dy dty leeideil gys arrys? 5Agh cordail rish creoghys dty chree vee-arryssagh, t’ou stoyral seose dhyt hene jymmoose cour laa’n yymmoose, as tra vees briwnys cairagh Yee er ny hoilshaghey; 6Nee cooilleeney dy chooilley ghooinney cordail rish e obbraghyn: 7Dauesyn, liorish tannaghtyn dy meen ayns jannoo mie, ta shirrey son gloyr, as ooashley, as flaunys; yn vea dy bragh farraghtyn: 8Agh dauesyn ta anveagh, as nagh vel coyrt biallys da’n irriney, agh geiyrt da neu-ynrickys: jymmoose as corree; 9Seaghyn as angaish er dy chooilley annym ta gobbraghey olk, er yn Ew hoshiaght, as myrgeddin er yn Ashoonagh. 10Agh gloyr, ooashley, as shee, da dy chooilley ghooinney ta gobbraghey mie, da’n Ew hoshiaght, as myrgeddin da’n Ashoonagh. 11Son cha vel Jee jannoo soiaghey jeh persoonyn. 12Son bee whilleen as t’er n’yannoo peccah fegooish leigh, er nyn gheyrey neesht fegooish y leigh: as bee whilleen as t’er n’yannoo peccah fo’n leigh, er nyn mriwnys liorish y leigh, 13(Son cha nee adsyn ta clashtyn y leigh ta seyr fenish Yee, agh jeantee yn leigh vees er ny heyrey. 14Son tra ta ny Ashoonee nagh vel y leigh oc, jannoo liorish dooghys ny reddyn t’ayns y leigh, t’ad shoh nagh vel y leigh oc, ny leigh daue hene: 15Ta soilshaghey obbyr y leigh scruit ayns nyn greeaghyn, nyn gooinsheanseyn myrgeddin gymmyrkey feanish, as nyn smooinaghtyn hene deyrey, ny seyrey ad ec y traa cheddin.) 16Ayns y laa tra nee Jee folliaghtyn gheiney y vriwnys liorish Yeesey Creest, cordail rish y sushtal fo my churrym. 17Cur-my-ner, t’ou goaill ort dy ve dty Ew, as t’ou coyrt dty varrant gys y leigh, as boggyssagh ayns Jee; 18As ta toiggal ayd jeh e aigney, as t’ou prowal ny reddyn s’ooasle, myr t’ou ynsit ass y leigh, 19As t’ou goaill ort hene, dy vel uss oo hene leeideilagh da ny doail, soilshey dauesyn t’ayns dorraghys, 20Coyrleyder yn vooinjer vee-hushtagh, fer-ynsee oikanyn, ayd ta cummey jeh’n tushtey as y firrinys t’ayns y leigh. 21Uss er-y-fa shen ta gynsaghey fer elley, nagh vel oo gynsaghey oo hene? uss ta preacheil nagh lhisagh dooinney geid, Vel oo hene geid? 22Uss ta gra nagh lhisagh dooinney poosey y vrishey, vel oo hene brishey poosey? uss ta cur dwoaie da jallooyn, vel uss dty vaarliagh er cooid chasherick? 23Uss ta boggyssagh ayns y leigh, vel oo liorish brishey’n leigh mee-ooashlaghey Jee? 24Son ta ennym Yee oltooanit mastey ny Ashoonee, kyndagh riuish, myr te scruit. 25Son dy firrinagh ta giarey-chymmylt vondeishagh, my t’ou freayll y leigh: agh my t’ou brishey’n leigh, ta dty ghiarey-chymmylt jeant ny an-ghiarey-chymmylt. 26Shen-y-fa, my ta’n an-ghiarey-chymmylt freayll cairys y leigh, nagh bee yn an-ghiarey-chymmylt echey er ny choontey son giarey-chymmylt? 27As nagh jean yn an-ghiarey-chymmylt ta liorish dooghys, my chooilleenys eh yn leigh, uss y vriwnys, ta liorish eer focklyn y leigh as giarey-chymmylt brishey’n leigh? 28Son cha nee Ew eshyn, ta fer er cheu-mooie; chamoo ta shen giarey-chymmylt, ta jeant er cheu-mooie ayns yn eill: 29Agh t’eshyn ny Ew, ta fer er cheu-sthie; as ta’n giarey-chymmylt [firrinagh shen] jeh’n chree, ayns y spyrryd, as cha nee ayns y letter, yn moylley echey cha vel veih deiney, agh veih Jee.