CAB. III

1Cre’n vondeish eisht t’ec yn Ew? ny cre’n cosney ta liorish giarey-chymmylt? 2Mooarane er dy chooilley aght: hoshiaght, son dy nee dauesyn v’er ny livrey goo Yee. 3Son cre mannagh ren paart credjal? jean y mee-chredjue ocsyn firrinys Yee y choyrt naardey? 4Ny lhig eh Jee: dy jarroo, lhig da Jee ve firrinagh, as dy chooilley ghooinney ny vreagerey; myr te scruit, Dy voddagh oo v’er dty heyrey ayns dty raa, as ynrick tra t’ou briwnys. 5Agh myr ta’n neu-ynrickys ainyn soilshaghey magh ynrickys Yee, cre jir mayd? Vel Jee neu-chairagh ta goaill kerraghey? (ta mee loayrt myr dooinney) 6Ny lhig eh Jee: son kys eisht nee Jee yn seihll y vriwnys? 7Son my ta firrinys Yee (jir ad) er vishaghey ny smoo trooid y neu-ynrickys aym’s gys y ghloyr echeysyn: cre’n-fa foast ta mish myrgeddin er my vriwnys myr peccagh? 8Agh cha nee (myr ta shin er nyn oltooan, as myr ta paart lhiassaghey dy vel shin gra,) Lhig dooin olk y yannoo, dy vod mie cheet jeh? ta’n deyrey oc cairagh. 9Cre eisht? vel shinyn ny share na adsyn? Cha vel er aght erbee: son ta shin roïe er phrowal dy vel chammah Ewnyn as Ashoonee, ooilley fo peccah; 10Myr te scruit, Cha vel fer erbee cairagh, cha vel unnane: 11Cha vel fer erbee ta toiggal, cha vel fer erbee ta shirrey lurg Jee. 12T’ad ooilley er n’gholl ass y raad, t’ad ooilley dyn ymmyd: cha vel fer hene ta jannoo dy mie, cha vel unnane. 13Ta’n scoarnagh oc oaie foshlit; lesh nyn jengey t’ad er chliaghtey molteyrys; ta pyshoon ard-nieughyn fo nyn meillyn: 14Ta’n beeal oc lane dy ghweeaghyn as dy herriuid: 15Ta ny cassyn oc gastey dy gheayrtey fuill. 16Ta toyrt-mow as treihys ayns nyn raaidyn: 17As raad y chee cha bione daue. 18Cha vel aggle Yee edyr roish nyn sooillyn. 19Nish ta fys ain cre-erbee ta’n leigh dy ghra, te dy ghra roosyn ta fo’n leigh: dy vod dagh beeal ve ny host, as dy vod ooilley’n seihll ve oolee fenish Yee. 20Shen-y-fa liorish obbraghyn y leigh cha bee dooinney erbee er ny heyrey ayns e hilley: son liorish y leigh ta toiggal ain jeh peccah. 21Son nish ta cairys Yee fegooish y leigh er ny hoilshaghey, myr ta’n leigh as ny phadeyryn gymmyrkey feanish lesh; 22Dy jarroo cairys Yee, ta liorish credjue Yeesey Creest, dauesyn ooilley, as orroosyn ooilley ta credjal; son cha vel liettrimys erbee: 23Son ta ooilley er n’yannoo peccah, as er jeet giare jeh gloyr Yee. 24Dy nastee jeant seyr liorish e ghrayse, trooid y livrey-ys ta ayns Yeesey Creest: 25Eh ta Jee er chiarail dy ve ny lhiassaghey, trooid credjue ayns e uill, dy hoilshaghey magh e chairys son leih peccaghyn t’er n’gholl shaghey, trooid meenid Yee: 26Dy hoilshaghey magh, ta mee gra, ec y traa shoh e chairys: dy voddagh eh ve cairagh, as eshyn y heyrey ta credjal ayns Yeesey. 27Cre vel boggys eisht? te giarit magh. Liorish cre’n leigh? nee jeh obbraghyn? Cha nee: agh liorish y leigh dy chredjue. 28Shen-y-fa ta shin briwnys, dy vel dooinney er ny heyrey liorish credjue fegooish obbraghyn y leigh. 29Vel eshyn Jee ny Hewnyn ny-lomarcan? nagh vel eh myrgeddin [Jee] ny Hashoonee? S’feer jeh ny Ashoonee myrgeddin. 30Fakin dy nee yn un Jee cheddin, nee seyrey yn giarey-chymmylt liorish credjue, as yn an-ghiarey-chymmylt trooid credjue. 31Vel shin eisht rassey yn leigh trooid credjue? ny lhig eh Jee: dy jarroo firrinagh, ta shin niartaghey’n leigh.