CAB. VI

1Cre jir mayd eisht? jean mayd tannaghtyn ayns peccah, dy vod grayse bishaghey? 2Ny lhig eh Jee: kys oddys shinyn ta marroo gys peccah, baghey ny-sodjey ayn? 3Nagh vel fys eu, dy row whilleen j’inyn as va er nyn mashtey ayns Yeesey Creest, er nyn mashtey gys y baase echey? 4Shen-y-fa ta shin oanluckit mârishyn liorish bashtey gys baase; ’naght myr va Creest troggit seose veih ny merriu liorish gloyr yn Ayr, dy jarroo myr shen lhisagh shin myrgeddin gimmeeaght ayns bea noa. 5Son my ta shin er ve soit cooidjagh ayns co-chaslys e vaase, bee mayd myrgeddin ayns co-chaslys yn irree-seose-reesht echey: 6Toiggal shoh, dy vel y chenn ghooinney ain er ny chrossey mârish, dy voddagh corp peccah ve er ny stroie, nagh jinnagh shin ny sodjey peccah y hirveish. 7Son eshyn ta marroo, t’eh seyr veih peccah. 8Nish my ta shin marroo mârish Creest, ta shin credjal dy bee mayd myrgeddin bio mârish: 9Toiggal, nagh vel Creest, myr t’eh er n’irree veih ny merriu, dy gheddyn baase arragh; cha vel pooar erbee sodjey ec y vaase harrish. 10Son liorish dy dooar eh baase, hooar eh baase gys peccah un cheayrt: agh liorish dy vel eh bio, t’eh bio gys Jee. 11Ayns yn aght cheddin jeeagh-jee shiuish neesht erriu hene dy ve marroo dy jarroo gys peccah; agh bio gys Jee, trooid Yeesey Creest nyn Jiarn. 12Ny lhig da peccah er-y-fa shen reill ayns nyn girp marvaanagh, dy jinnagh shiu eh y hirveish ayns ny yeearreeyn eck. 13Chamoo livrey-jee seose nyn oltyn myr greinyn dy neu-chairys gys peccah: agh livrey-jee shiu hene seose gys Jee, myr adsyn ta bio veih ny merriu; as nyn oltyn myr greinyn dy chairys gys Jee. 14Son cha bee pooar ec peccah harrishdiu: son cha vel shiu fo’n leigh, agh fo grayse. 15Cre eisht? der mayd rish peccah, er-yn-oyr nagh vel shin fo’n leigh, agh fo grayse? ny lhig eh Jee. 16Nagh vel fys eu, da quoi-erbee ta shiu kiangley shiu hene sharvaantyn dy chur biallys, ny sharvaantyn echeysyn ta shiu da ta shiu coyrt biallys; edyr jeh peccah gys baase, ny jeh biallys gys cairys? 17Agh booise dy row gys Jee, son wheesh as dy row shiu roïe sharvaantyn peccah; dy vel shiu nish er choyrt biallys veih’n chree da’n cummey dy ynsagh v’er ny livrey diu. 18Er nyn seyrey eisht veih peccah, haink shiu dy ve sharvaantyn dy chairys. 19Ta mee loayrt lurg cliaghtey deiney, er coontey annooinid yn eill eu: son ’naght myr ta shiu er livrey seose ny oltyn eu dy ve sharvaantyn gys neu-ghlennid, as veih mee-chairys gys mee-chairys; myr shen jean-jee nish livrey seose ny oltyn eu sharvaantyn dy ynrickys, gys casherickys. 20Son tra va shiu nyn sharvaantyn dy pheccah, va shiu fegooish ynrickys. 21Cre’n mess v’eu eisht ayns ny reddyn shen jeu ta shiu nish goaill nearey? son ta jerrey ny reddyn shen baase. 22Agh nish myr ta shiu er nyn seyrey veih peccah, as er jeet dy ve nyn sharvaantyn dy Yee, ta eu nyn mess gys casherickys, as y jerrey echey yn vea dy bragh farraghtyn. 23Son she faill peccah yn baase: agh she gioot Yee yn vea dy bragh beayn, trooid Yeesey Creest nyn Jiarn.