CAB. VII

1Nagh vel shiu toiggal, vraaraghyn, son (ta mee loayrt roosyn ta toiggal y leigh) kys dy vel pooar ec y leigh harrish dooinney, choud as t’eh bio? 2Son ta’n ven ta sheshey eck, kianlt liorish y leigh da’n sheshey eck choud as t’eh bio: agh my ta’n sheshey marroo t’ee feayshlit voish leigh yn sheshey eck. 3Myr shen eisht my vees ee, choud as ta’n sheshey eck bio, poost rish dooinney elley, bee ee kyndagh jeh brishey-poosey: agh my ta’n sheshey eck marroo, t’ee feayshlit veih’n leigh shen; myr shen cha vel ee brishey-poosey, ga dy bee ee poost rish dooinney elley. 4Shen-y-fa, my vraaraghyn, ta shiuish myrgeddin marroo gys y leigh liorish corp Chreest; dy voddagh shiu ve poost rish fer elley, dy jarroo rishyn ta troggit veih ny merriu, dy voddagh shin mess y ymmyrkey magh da Jee. 5Son tra va shin ayns yn eill, ren yeearreeyn peccoil va liorish y leigh, gobbraghey ayns nyn oltyn dy ymmyrkey magh mess gys baase. 6Agh nish ta shin livreït veih’n leigh, marroo gys shen fo va shin freilt; dy voddagh shin shirveish ayns spyrryd noa, as cha nee ayns y chenn letter. 7Cre jir mayd eisht? vel y leigh peccah? ny lhig eh Jee. Dy jarroo, cha row fys er ve aym cre va peccah, agh liorish y leigh: son cha row fys er ve aym cre va saynt, er-be dy dooyrt y leigh, Cha der oo saynt. 8Agh peccah goaill vondeish liorish yn anney, ren gobbraghey aynym dy chooilley haynt. Son fegooish y leigh ta peccah marroo. 9Son va mish dy jarroo bio un cheayrt fegooish y leigh; agh tra haink yn anney, vio-ee peccah, as va mish marroo. 10As yn anney v’er ny oardaghey son bioys, hooar mee dy ve baase. 11Son peccah goaill vondeish liorish yn anney, ren m’y volley, as liorish ren eh m’y varroo. 12Myr shen ta’n leigh casherick; as ta’n anney casherick, as cairagh, as mie. 13Vel shen eisht va mie, er jeet dy ve baase dou? Ny lhig eh Jee. Agh peccah, dy voddagh eh ve soilshit dy ve peccah, gobbraghey baase aynym’s liorish shen ta mie; dy voddagh peccah liorish yn anney cheet dy ve erskyn-towse peccoil. 14Son ta fys ain dy vel y leigh spyrrydoil: agh ta mish callinagh creckit fo peccah. 15Son ny ta mee jannoo, cha vel mee lowal jeh: son shen ny baillym, cha vel mee jannoo; agh ny ta dwoaie aym er, shen ta mee jannoo. 16My ta mish eisht jannoo shen nagh baillym, ta mee goaill-rish y leigh, dy vel eh mie. 17Nish eisht, cha nee mee hene ta ny sodjey dy yannoo eh, agh peccah ta baghey aynym. 18Son ta fys aym, nagh vel aynym’s, (ta shen, ayns m’eill) red erbee mie cummal: son ta my aigney arryltagh, agh dy yannoo shen ta mie, cha vel eh cheet lhiam. 19Son y vie shen baillym, cha vel mee jannoo: agh yn olk nagh naillym, shen ta mee jannoo. 20Nish my ta mee jannoo shen nagh naillym, cha nee ny smoo mish ta dy yannoo eh, agh peccah ta baghey aynym. 21Ta mee feddyn leigh eisht, tra baillym mie y yannoo, dy vel olk goll mârym. 22Son ta taitnys aym ayns leigh Yee, cordail rish y dooinney er cheu-sthie. 23Agh ta mee gennaghtyn leigh elley ayns my oltyn, caggey noi leigh my aigney, as dy my hayrn fo bondiaght gys y leigh dy pheccah, t’ayns my oltyn. 24O s’treih’n dooinney mee! quoi nee my livrey veih corp y vaase shoh! 25Ta mee cur booise da Jee, trooid Yeesey Creest nyn Jiarn. Myr shen eisht, ta mish mee-hene lesh m’aigney shirveish leigh Yee; agh lesh yn eill, leigh peccah.