CAB. VIII

1Cha vel er-y-fa shen deyrey erbee ny chour ocsyn t’ayns Creest Yeesey, nagh vel gimmeeaght lurg yn eill, agh lurg y Spyrryd. 2Son ta leigh Spyrryd y vea, ayns Creest Yeesey, er n’yannoo mee seyr veih leigh peccah as baase. 3Son shen nagh voddagh y leigh y yannoo, trooid annooinid ny foalley, ren Jee liorish coyrt e Vac hene, ayns caslys feill peccoil, as son peccah, peccah y gheyrey ayns yn eill: 4Dy voddagh cairys y leigh v’er ny chooilleeney aynin, nagh vel gimmeeaght lurg yn eill, agh lurg y spyrryd. 5Son t’adsyn ta baghey lurg yn eill, geiyrt da nheeghyn foalley; agh adsyn ta lurg y Spyrryd, er nheeghyn spyrrydoil. 6Son ta yeearree yn eill, baase; agh yeearree yn Spyrryd, bea as shee: 7Er-yn-oyr dy vel yeearree ny foalley noidys rish Jee: son cha vel eh fo reill leigh Yee, chamoo dy jarroo oddys eh ve. 8Myr shen eisht cha vod adsyn ta gimmeeaght lurg yn eill, Jee y wooiys. 9Agh cha vel shiuish ayns yn eill, agh ayns y Spyrryd, my she shen dy vel Spyrryd Yee baghey ayndiu. Nish mannagh vel ec dooinney erbee Spyrryd Chreest, cha nee leshyn eh. 10As my ta Creest ayndiu, ta’n corp marroo, kyndagh rish peccah; agh ta’n spyrryd bea, liorish cairys. 11Agh my ta’n Spyrryd echeysyn hrog seose Yeesey veih ny merriu, baghey ayndiu; nee eshyn hrog Creest veih ny merriu, ny kirp marvaanagh euish myrgeddin y vioghey, liorish e Spyrryd ta cummal ayndiu. 12Shen-y-fa, vraaraghyn, ta shin jatteryn, cha nee da’n eill, dy vaghey lurg yn eill: 13Son my ta shiu baghey lurg yn eill, yiow shiu baase: agh my ta shiu trooid y Spyrryd cur naardey obbraghyn y challin, bee shiu bio. 14Son whilleen as ta er ny leeideil liorish Spyrryd Yee, t’ad nyn mec dy Yee. 15Son cha vel shiu er ghoaill yn Spyrryd dy vondiaght reesht dy ve fo aggle; agh ta shiu er gheddyn yn Spyrryd dy gholtanys, liorish ta shin geamagh, Abba, Ayr. 16Ta’n Spyrryd hene gymmyrkey feanish lesh y spyrryd ain, dy vel shin nyn gloan dy Yee. 17As my she cloan shin, eisht eiraghyn; eiraghyn dy Yee, as co-eiraghyn marish Creest: my she shen dy vel shin surranse mârishyn, dy vod mayd myrgeddin ve cooidjagh er nyn ghloyraghey. 18Son ta mee coontey, nagh vel seaghyn y vea shoh feeu dy ve er ny hoylaghey gys y ghloyr vees er ny hoilshaghey dooinyn. 19Son ta jerkal jeean yn chretoor farkiagh son y traa vees cloan Yee er ny hoilshaghey. 20Son va’n cretoor er ny injillaghey gys fardail, cha nee jeh e yoïn, agh kyndagh rishyn ren eh y injillaghey. 21Ayns treishteil dy bee yn cretoor hene myrgeddin er ny livrey veih’n vondiaght dy neu-ghlennid, gys y reamys gloyroil dy chloan Yee. 22Son ta fys ain dy vel yn slane seihll geamagh magh, as myr ayns pianyn troailt cooidjagh derrey nish: 23As cha nee adsyn ny-lomarcan, agh shin hene myrgeddin, ainyn ta’n chied-vess jeh’n Spyrryd, dy jarroo ta shinyn shin hene osnaghey cheu-sthie j’in hene, farkiagh son y doltanys, ta shen, livrey-ys nyn gallinyn. 24Son ta shin er nyn sauail liorish treishteil: agh y treishteil ta er ny akin, cha nee treishteil eh: son cre’n-fa ta dooinney foast jerkal rish shen t’eh fakin. 25Agh my ta shin treishteil son shen nagh vel shin fakin, eisht ta shin lesh meenid farkiaght er y hon. 26Ta’n Spyrryd hene myrgeddin niartaghey lesh ny annooinidyn ain: son cha vel fys ain cre ta shin dy ghuee er y hon myr lhisagh shin: agh ta’n Spyrryd cheddin jannoo accan er nyn son lesh osnaghyn nagh vod glare soilshaghey. 27As ta fys echeysyn ta ronsaghey yn cree, cre ta aigney yn Spyrryd, er-yn-oyr dy vel eh jannoo accan ayns lieh ny nooghyn cordail rish aigney Yee. 28As ta fys ain dy vel dy chooilley nhee gobbraghey cooidjagh son y chooid share, dauesyn ta graihagh er Jee, dauesyn t’er nyn eam cordail rish e aigney. 29Son adsyn honnick eh ro-laue, ren eh myrgeddin kiarail ro-laue dy ve er nyn gaghlaa gys cummey e Vac, dy voddagh eh ve yn mac shinney mastey ymmodee braaraghyn. 30As adsyn ren eh kiarail ro-laue, orroo shoh ren eh myrgeddin geamagh: as adsyn ren eh geamagh, ren eh myrgeddin seyrey: as adsyn t’eh er heyrey, t’eh myrgeddin er ghloyraghey. 31Cre jir mayd eisht rish ny reddyn shoh? my ta Jee lhien, quoi oddys ve nyn ’oï? 32Eshyn nagh ren e Vac hene y haghney, agh livrey eh eh seose er nyn son ooilley, kys nagh der eshyn dooin myrgeddin dy arryltagh mârishyn dy chooilley nhee? 33Quoi ver nhee erbee gys lieh cloan reiht Yee? she Jee ta seyrey: 34Quoi eh ta deyrey? she Creest hooar baase, ny sodjey, t’er n’irree reesht, ta eer ec laue yesh Yee, as ta myrgeddin loayrt ayns y lieh ain. 35Quoi nee shinyn y scarrey veih graih Chreest? jean seaghyn, ny chennid, ny tranlaase, ny gortey, ny rooishtid, ny gaue, ny cliwe? 36(Myr te scruit, Er dty ghraih ta shin ayns dangeyr baaish fey-ny-laa; ta shin coontit myr kirree ta pointit dy ve er nyn stroie) 37Agh ta shin er n’gheddyn ny smoo na’n varriaght ayns ooilley ny reddyn shoh, ny hrooidsyn hug graih dooin. 38Son ta slane shickyrys aym, nagh bee edyr baase, ny bioys, ny ainleyn, ny ard-reiltee, ny pooaraghyn seihltagh, ny reddyn ta nish ayn, ny reddyn ta ry-heet, 39Ny yrjid, ny diunid, ny cretoor erbee elley, abyl shinyn y scarrey veih graih Yee, t’ayns Creest Yeesey nyn Jiarn.