CAB. IX

1Ta mee gra’n irriney ayns Creest, cha vel mee jannoo breg, my chooinsheanse myrgeddin gymmyrkey feanish lhiam ayns y Spyrryd Noo. 2Dy vel aym trimshey trome as dobberan kinjagh ayns my chree. 3Son baillym dy beign hene giarit magh veih Creest, er graih my vraaraghyn as my chynney cordail rish yn eill: 4Ta nyn Israeliteyn; dauesyn ta bentyn yn doltanys, as y ghloyr, as ny conaantyn, as coyrt y leigh, as shirveish Yee, as ny gialdynyn; 5Lhieu va ny ayraghyn, as jeusyn cordail rish yn eill haink Creest, ta harrish ooilley, Jee bannit son dy bragh. Amen. 6Cha nee dy vod goo Yee ve gyn bree. Son cha nee Israeliteyn ad ooilley, ta jeh Israel. 7Chamoo son dy nee sluight Abraham ad, dy vel ad ooilley e chloan: agh ayns Isaac bee’n sluight ayd’s er nyn eam. 8Ta shen, Adsyn ta nyn gloan jeh’n eill, cha vel ad shoh nyn gloan dy Yee, agh ta cloan yn ghialdynys goit son y sluight. 9Son shoh raa yn ghialdynys, Cordail rish y traa shoh hig-yms, as bee mac ec Sara. 10As cha nee shoh ny-lomarcan, agh tra va Rebecca myrgeddin er ghientyn ec yn un cheayrt, dy jarroo liorish nyn ayr Isaac. 11(Son roish my daink y chloan er y theihll, chamoo v’ad er n’yannoo mie ny sie, dy voddagh oardagh Yee cordail rish e reih arryltagh shassoo, cha nee liorish obbraghyn, agh veihsyn ta geamagh) 12Ve raït r’ee, Nee’n fer shinney yn fer saa y hirveish. 13Myr te scruit, Ta mee er choyrt graih da Jacob, agh er hoiaghey beg jeh Esau. 14Cre jir mayd eisht? Vel neu-chairys marish Jee? Ny lhig eh Jee. 15Son t’eh gra rish Moses, Bee’m myghinagh dasyn saillym myghin y hoilshaghey, as bee chymmey aym ersyn da saillym ve chymmoil. 16Myr shen eisht cha vel eh jehsyn ta aignagh, ny jehsyn ta roie, agh jeh Jee ta soilshaghey myghin. 17Son ta’n scriptyr gra rish Pharaoh, Son yn eer oyr shoh ta mee er dty hroggal seose, dy voddin soilshaghey my phooar aynyd’s, as dy beagh m’ennym’s er ny ockley magh trooid ooilley’n seihll. 18Shen-y-fa t’eh myghinagh, dasyn saillish ve myghinagh, as eshyn saillish, t’eh dy chreoghey. 19Jir uss eisht rhym, Cre’n-fa t’eh foast feddyn foill? Son quoi t’er hassoo magh noi e aigney? 20Agh quoi uss, O ghooinney, ta pleadeil noi Jee? jir yn red t’er ny chummey rishyn ren eh y chummey, Cre’n-fa t’ou er my yannoo myr shoh? 21Nagh vel pooar ec y pasheyder harrish y chray, dy yannoo jeh’n un stoo saagh gys ymmyd ooasle, as saagh elley gys ymmyd mee-ooasle? 22Cre my ren Jee, va’n aigney echey dy hoilshaghey e yymmoose, as dy yannoo e phooar cronnal, gymmyrkey lesh lane surranse-foddey rish ny siyn dy chorree aarloo son toyrt-mow: 23As dy hoilshaghey berchys e ghloyr er ny siyn dy vyghin, v’eh roïe er chiarail son gloyr? 24Dy jarroo shinyn t’eh er n’eam, cha nee jeh ny Hewnyn ny-lomarcan, agh jeh ny Ashoonee myrgeddin. 25Myr t’eh gra myrgeddin ayns Hosea, Nee’m genmys adsyn my phobble, nagh row my phobble; as ish, my ghraih, nagh row my ghraih. 26As hig eh gy-kione, raad ve er ny ghra roo, Cha nee shiuish my phobble; ayns shen bee ad er nyn enmys cloan y Jee bio. 27Ta Esaias myrgeddin fockley magh mychione Israel, Ga dy vel earroo cloan Israel myr geinnagh ny marrey, bee fooilliagh er ny hauail. 28Son nee’n Chiarn jannoo seose as giarey jeh yn coontey ayns cairys: son nee yn Chiarn obbyr ghiare er y thalloo. 29As myr dooyrt Esaias roïe, Mannagh beagh y Chiarn jeh’n cheshaght-chaggee er vaagail dooin sluight, veagh shin er ny ve myr Sodoma, as jeant casley rish Gomorrha. 30Cre jir mayd eisht? Dy vel ny Ashoonee nagh ren geiyrt er cairys, er roshtyn gys cairys, dy jarroo yn chairys ta liorish credjue: 31Agh cha vel Israel, va geiyrt er ynrickys y leigh, er roshtyn gys leigh yn chairys. 32Cre’n-fa? Er-yn-oyr nagh hir ad er y hon liorish credjue, agh myr dy beagh eh liorish obbraghyn y leigh: son ren ad snapperal ec y chlagh hug orroo tuittym; 33Myr te scruit, Cur-my-ner, ta mee soiaghey ayns Sion clagh-snapperal, as creg vees oyr tuittym: as quoi-erbee ta credjal ersyn, cha jig eh giare jeh e hreishteil.