CAB. I

1Nish haink eh gy-kione rish lhing ny briwnyn, dy row gortey ’sy cheer: as hie dooinney dy row jeh Beth-lehem-judah dy chummal ayns cheer Voab, eh-hene, e ven, as e ghaa vac. 2As va ennym yn dooinney Elimelech, as ennym yn ven Naomi, as ennym e ghaa vac Mahlon as Chilion, Ephrathiteyn jeh Beth-lehem-judah: as haink ad gys cheer Voab, as duirree ad ayns shen. 3As hooar Elimelech dooinney Naomi baase; as v’ee faagit lesh e daa mac. 4As phoose ad mraane ayns Moab; va ennym yn derrey yeh Orpah, as ennym yn jeh elley Ruth: as ren ad cummal ayns shen mysh jeih bleeaney. 5As hooar Mahlon as Chilion nyn-neesht baase, as va’n ven faagit gyn sheshey as gyn cloan.

6Eisht hrog ee urree marish ny inneenyn-’sy-leigh eck, dy aagail cheer Voab: son v’ee er chlashtyn ayns cheer Voab, dy row’n Chiarn er yeeaghyn er e phobble, as er choyrt daue arran. 7Shen-y-fa daag ee ynnyd e joarreeaght, as y daa inneen-’sy-leigh eck mâree; as ghow ad y raad gys thalloo Yudah. 8As dooyrt Naomi rish y daa inneen-’sy-leigh eck, Immee-jee, chyndaa-jee reesht gys thie nyn mayrey: dy jean y Chiarn dellal dy graysoil riuish, myr ta shiuish er ghellal rish ny merriu, as rhym’s. 9Dy giall y Chiarn diu ny-neesht gerjagh y gheddyn ’sy thie ocsyn ta kiarit dy ve nyn sheshaghyn. Eisht phaag ee ad: as hrog ad seose nyn goraa, as ren ad keayney. 10As dooyrt ad r’ee, Hem mayd son shickyrys mayrt’s gys dty phobble. 11As dooyrt Naomi, Chyndaa-jee reesht, my chloan: cre hon hed shiu mârym’s? vel tooilley mec dy ve foast er my ymmyrkey, dy ve son sheshaghyn diu? 12Chyndaa-jee reesht, my inneenyn, immee-jee reue; son ta mish ro henn dy phoosey. My yarrin, dy vel mee foast ayns treishteil, as sheshey ’ve aym yn oie shoh, as myrgeddin mec y ymmyrkey; 13Jinnagh shiu farkiagh er nyn son derrey harragh ad gys eash? jinnagh shiu fuirriaght gyn poosey er nyn son? cha vod eh ve, my chloan; son er y ghraih euish, ta mee dy mooar seaghnit, dy vel laue y Chiarn er n’gholl magh m’oï. 14As hrog ad seose nyn goraa, as cheayn ad reesht: as phaag Orpah e moir-’sy-leigh, agh duirree Ruth mâree. 15As dooyrt Naomi, Cur-my-ner, ta dty huyr-’sy-leigh er gholl back gys e pobble, as gys ny jeeghyn eck hene; chyndaa uss geiyrt er dty huyr-’sy-leigh. 16As dooyrt Ruth, Ny jean m’y hionney dy hreigeil oo, as dy gholl roym: son raad erbee dy jed uss, hem’s mayrt; as raad nee uss aaght y ghoaill, goyms myrgeddin aaght: bee’n pobble ayd’s, yn pobble aym’s, as y Jee ayd’s, my Yee’s: 17Raad yioys [oo] baase, yioyms baase, as shen y raad bee’m oanluckit: shoh as ny smoo dy der y Chiarn orrym, my nee veg agh y baase scarrey uss as mish. 18Tra honnick ee dy row ee soit er goll mâree, eisht cha dooyrt ee arragh r’ee.

19Myr shen hie ad ny-neesht derrey haink ad gys Beth-lehem. As shen myr ve, tra v’ad er roshtyn gys Beth-lehem, dy daink ooilley’n ard-valley mygeayrt-y-moo, goaill yindys, as gra, Nee shoh Naomi? 20As dooyrt eh roo, Ny abbyr-jee Naomi rhym, agh Mara; son ta’n Chiarn er ghellal dy feer sharroo rhym. 21Hie mee magh lane, as ta’n Chiarn er chur lesh mee thie reesht follym: cre’n-fa eisht ta shiu genmys mee Naomi, fakin dy vel y Chiarn er m’y injillaghey, as ta’n Ooilley-niartal er choyrt seaghyn orrym? 22Myr shoh haink Naomi thie, as Ruth yn Moabitess, yn inneen-’sy-leigh eck, mâree, va er jeet veih cheer Voab: as haink ad gys Beth-lehem ayns toshiaght y fouyr-oarn.