CAB. III

1Eisht dooyrt Naomi e moir-’sy-leigh r’ee, My inneen, nagh vel eh lhie orrym’s dy gheddyn ynnyd-vaghee shickyr er dty hon, dy vod oo ve dy mie ’sy theihll? 2As nish, nagh vel Boaz, v’ou marish e vraane aegey, jeh’n kynney ain? cur-my-ner, t’eh fasney oarn yn fastyr shoh ’sy laare-vooie. 3Niee oo-hene eisht, as jean oo-hene y ooilaghey, as cur ort dty gharmad share, as gow sheese gys y laare; agh ny jeeagh oo-hene da, derrey vees eh erreish gee as giu. 4As tra hed eh dy lhie, gowee oo tastey mie jeh’n boayl, as nee oo goll stiagh, as lhie sheese ec e chassyn; as inshee eh dhyt cre t’ort dy yannoo. 5As dansoor ee, Ooilley ny t’ou er ghra rhym nee’m y yannoo.

6As hie ee sheese gys y laare, as ren ee cordail rish ooilley ny doardee e moir-’sy-leigh jee. 7As tra va Boaz er n’ee as er n’iu, as y cree echey gennal, hie eh dy lhie sheese ec kione y dash-arroo: as haink ee dy aashagh, as lhie ee sheese ec e chassyn.

8As haink eh gy-kione ec y vean-oie, dy row’n dooinney agglit, as dennee eh, as cur-my-ner, va ben ny lhie ec e chassyn. 9As dooyrt eh, Quoi oo-hene? As dansoor ee, She mish Ruth dty inney-veyl; gow mee er-y-fa shen fo dty choadey, son t’ou faggys mooinjerys dou. 10As dooyrt eh, Bannit dy row uss jeh’n Chiarn, my inneen; son t’ou er yeeaghyn ny smoo dy chenjallys ’sy chooish s’jerree shoh na ec y toshiaght, fakin nagh deiyr oo er deiney aegey, berchagh ny boght. 11As nish, my inneen, ny bee aggle ort; neem’s er dty hon ooilley ny t’ou dy yeearree: son ta fys ec ooilley cummaltee’n ard-valley, dy vel oo ben onneragh. 12As nish, spheer eh dy vel mish my ghooinney-mooinjerey faggys dhyt: agh ta dooinney-mooinjerey ayn ny sniessey na mish. 13Fuirree noght raad t’ou, as mairagh, my nee eh cooilleeney currym dooinney-mooinjerey, s’mie te; lhig da shen y yannoo: agh my obbys eh dy chooilleeney currym dooinney-mooinjerey, eisht, myr ta’n Chiarn bio, neem’s yn currym shen ’chooilleeney: lhie sheese derrey’n voghrey.

14As lhie ee sheese ec e chassyn derrey’n voghrey; as ren ee girree my b’leayr da sleih y cheilley. As dooyrt eh, Ny lhig da fys’ve ec unnane erbee dy daink ben stiagh ’sy laare-vooie. 15Dooyrt eh myrgeddin, Cur lhiat y vreid ta ort, as cum eh rhym. As tra chum ee eh, hug eh ayn shey towseyn dy oarn, as hrog eh urree eh; as hie ee gys yn ard-valley. 16As tra haink ee gys e moir-’sy-leigh, dooyrt eh, Nee shoh oo, my inneen? As dinsh ee jee ooilley ny va’n dooinney er n’yannoo er e son. 17As dooyrt ee, Ny shey towseyn shoh dy oarn hug eh dou; son dooyrt eh rhym, Ny gow follym gys dty voir-’sy-leigh. 18Eisht dooyrt ee, Fark ort, my inneen, derrey hee mayd kys hed y chooish: son cha bee fea er y dooinney derrey vees eh er y laa shoh er chooilleeney e yialdyn.