CAB. I

1Arrane dy arraneyn mychione Solomon.

2Lhig da mish y phaagey lesh paagyn e veeal: son ta dty ghraih ny s’miljey na feeyn. 3Son blass dty ooilyn miljey, ta dty ennym myr ooil er ny gheayrtey; shen-y-fa ta ny moidynyn ayns graih rhyt. 4Jean m’y chleayney, as roie mayd geiyrt ort: ta’n ree er choyrt lesh mee stiagh gys e hiamyryn, bee mayd gennal, as gowee mayd boggey aynyd’s, bee mayd ny s’aggindee er dty ghraih na er feeyn: shynney lesh sleih mie oo. 5O shiuish inneenyn Yerusalem, ta mee dorraghey myr cabbaneyn Chedar, agh stoamey myr curtanyn Solomon. 6Ny jeeagh-jee orrym’s, son dy vel my neeal dorraghey, as dy vel y ghrian er chaghlaa my vlaa: va cloan my vayrey neu-ghooghyssagh rhym, hug ad mee dy arrey ny garaghyn-feeyney, agh my gharey-feeyney hene cha dreill mee. 7Insh dou, O uss ghraih m’annym, c’raad t’ou fassaghey, cre’n raad ta’n chioltane ayd’s goaill nyn aash bwoaillee vun-laa: son cre’n-fa veign myr shaghrynagh mastey shioltaneyn dty heshaghyn?

8Mannagh nhione dhyt, O uss s’aalin ta mastey mraane, immee magh ayns cassanyn yn chioltane, as fassee dty vannanyn liorish ny bwaagyn bochill. 9Ta mee er dty hoylaghey, O my ghraih, gys cabbil aalin ayns fainee Pharaoh. 10Ta dty cheeillyn bwaagh soit magh lesh roaghyn dy yewellyn, dty wannal lesh boandaghyn airhey. 11Nee mayd er dty hon chemmallyn airhey lesh taggadyn argid.

12Choud’s ta’n ree soie ec yn voayrd, nee’n spikenard aym’s soar millish y choyrt magh. 13Ta my ghraih dooys myr dhossan myrrh; lhie fud-ny-hoie ayns my oghrish. 14Ta my ghraih dooys myr croau camphire ayns garaghyn-feeyney En-gedi. 15Cur-my-ner, t’ou aalin my ghraih; cur-my-ner t’ou aalin, ta ayd sooillyn calmane. 16Cur-my-ner, t’ou aalin, my ghraih, dy jarroo eunyssagh: ta’n lhiabbee ain myrgeddin geayney. 17Beamyn yn thie ain jeh cedar, as ny jeaystyn juys.