CAB. II

1She mish rose Sharon, as lilee ny coanyn. 2Myr lilee mastey drineyn, myr shen ta my ghraih’s mastey ny mraane aegey. 3Myr yn billey-ooyl mastey biljyn ny keylley, myr shen ta my ghraih mastey ny deiney aegey. Hoie mee sheese fo’n scadoo echey lesh mooarane taitnys, as s’millish va e vess gys my vlass. 4Hug eh lesh mee gys thie e chuirraghyn, as skeayl eh harrym cullee e ghraih. 5Niartee mee lesh glassyreeyn miljey, jean mish y ooraghey lesh ooylyn: son ta mee ching ayns graih. 6Ta e laue chiare fo my chione, as ta’n laue yesh echey dy my ghlassey. 7Ta mee cur currym erriu, O shiuish inneenyn Yerusalem, liorish y taitnys t’eu ayns ny feeaïhee sleitagh as magheragh, nagh boir-jee my ghraih, as nagh doost-jee eh derrey saillish hene.

8Coraa my ghraih’s! cur-my-ner t’eh cheet lheim er ny sleityn, cor-lheimyragh er ny croink. 9Ta my ghraih myr feeaïh aalin aeg: cur-my-ner, t’eh shassoo cooyl yn voalley ain, t’eh jeeaghyn magh er yn uinniag, t’eh dy yeeaghyn eh-hene trooid y chlea. 10Loayr my ghraih, as dooyrt eh rhym, Trog ort, my ghraih, my chooid s’aalin, as tar royd. 11Son cur-my-ner ta’n geurey ceaut, ta’n fliaghey harrish as ersooyl. 12Ta ny blaaghyn ry-akin er y thalloo, ta imbagh kiaulleeaght ny ushagyn er jeet, as ta bingys yn turtle er ny chlashtyn ’sy cheer ain. 13Ta’n billey-figgagh gymmyrkey figgyn glassey, as ta ny biljyn-feeyney lesh nyn merrishyn meiygh ceau soar millish. Trog ort, my ghraih, my chooid s’aalin, as tar royd.

14O my chalmane ta ayns tuill ny creggyn, fo skellooyn yn eaynee, lhig dou dty eddin y akin, lhig dou dty choraa y chlashtyn; son s’eunyssagh dty choraa, as stoamey dty eddin aalin. 15Soie ribbey son ny shynnee, son ny quallianyn shynnagh ta mhilley ny biljyn-feeyney: son ta ny berrishyn meiygh cheet magh er ny biljyn-feeyney.

16Ta my ghraih lhiam’s, as mish leshyn: t’eh beaghey mastey ny lileeyn. 17Derrey’n vadran, as skeayley ny bodjallyn, chyndaa my ghraih, as bee uss myr y vinjeig feïe, ny’n feeaïh aeg er sleityn Vether.