CAB. IV

1Cur-my-ner t’ou uss aalin, my ghraih, cur-my-ner t’ou uss aalin, ta sooillyn calmane ayd fo dty vreidyn; ta dty olt myr shioltane dy ghoair, ta fassagh er cronk Ghilead. 2Ta dty eeacklyn goll-rish shioltane glen loamrit erreish daue ve nieet: jeu shoh ta dagh unnane lesh lannoon, as cha vel unnane gennish ny mast’ oc. 3Ta dty veillyn goll-rish snaie scarleod, as s’meeley ta dty ghlare; ta dty cheeillyn myr blaa yn phomegranate fo dty vreidyn. 4Ta dty wannal goll-rish toor Ghavid troggit son thie armyn, soit magh lesh thousane buckler, ooilley scapeyn ny treanee. 5Ta dty cheeaghyn goll-rish daa feeaïh aegey ta nyn lannoonyn, fassagh mastey ny lileeyn. 6Derrey brishey’n laa, as skeayley ny bodjallyn, hem’s roym gys y charnane myrrhey, as gys y chronk frankincense. 7T’ou ooilley aalin, my ghraih, cha vel cron erbee aynyd’s.

8Tar mârym’s voish Lebanon, my ven-phoosee, mârym’s voish Lebanon: jeeagh sheese voish mullagh Amana, veih yrjid Shenir as Hermon, voish ooig ny lionyn, voish sleityn y lion spottagh. 9T’ou er chleayney my chree, my ghraih, my gherjagh, lesh un shallid jeh dty hooillyn, lesh un chyndaa jeh dty wannal t’ou er ghoaill my chree. 10Cre cha eunyssagh ta dty ghraih, my huyr, my ven veen! ta dty ghraih foddey erskyn y feeyn share, as soar millish dty ennal roish bree dy chooilley spice s’blaystal. 11Ta dty veillyn, O my ven veen, shilley myr kere-volley: ta bainney as mill fo dty hengey, ta soar millish dty gharmadyn myr soar Lebanon. 12Garey dooint ta my ghraih, my ven heshey, t’ee chibbyr glast, as moir y gheill sealit. 13T’ou uss myr garey Phargys, soit magh lesh pomegranateyn, lesh ny messyn s’aalin, lesh camphire as spikenard. 14Spikenard as saffron, calamus as cinnamon, marish dy chooilley ghooghys dy viljyn frankincense, myrrh as aloes, marish dy chooilley spice costal. 15Farrane ny garaghyn, chibbyr dy ushtey bio, as strooanyn voish Lebanon.

16Gow fea, O gheay-jiass, agh dooisht, O gheay-twoaie, as tar magh, sheid er my gharey dy vod ny spiceyn blaaghey: lhig da my ghraih cheet gys e gharey hene, as gee jeh ny messyn s’taitnyssagh.