CAB. VI

1Cre’n raad ta dty ghraih er ghoaill, O uss s’aalin ta mastey mraane? cre’n raad ta dty ghraih er hyndaa? dy vod mayd mayrt’s shirrey er e hon. 2Ta my ghraih er n’gholl sheese gys e gharey, gys ny imraghyn spice, dy ee mess ny garaghyn, as dy haglym lileeyn. 3Ta mish lesh my ghraih, as my ghraih lhiam’s: t’eh beaghey mastey ny lileeyn.

4T’ou uss aalin, O my ghraih, myr Tirzah, stoamey myr Jerusalem, gloyroil myr slane sollyssid rollageagh yn aer. 5Chyndaa dty hooillyn orrym, dy vod ad my vaynrey: ta dty olt myr shioltane dy ghoair t’er ny akin veih Gilead. 6Ta dty eeacklyn myr shioltane keyrragh erreish daue ve nieet, dagh unnane jeu breh lannoon, as cha vel unnane gennish nyn mastey. 7Ta dty cheeillyn myr blaa yn phomegranate fo dty vreidyn. 8Ta three-feed princess, as kiare-feed co-lhiabbagh, marish ymmodee moidynyn: 9Agh she my chalmane aalin ta my ynrycan graih; t’eeish lhiannoo ynrycan e moir, ynrycan ennoil jeeish hug gys y theihll ee: honnick ny moidynyn ee, as vannee ad ee, ny princessyn neesht, as ny co-lhiabbee hug moylley jee.

10Quoi eh shoh ta brishey magh myr y voghrey, gial myr yn eayst, sollys myr yn ghrian, as gloyroil myr slane sheshaght rollageagh yn aer? 11Hie mee sheese gys garey ny croyn, dy chur shilley er troar ny glionney, as dy yeeaghyn row yn billey-feeyney blaaghey, as ny pomegranateyn cheet er nyn doshiaght. 12’Sy tullogh, hie my annym er e eiyrt’s, cha bieau as cha tappee as fainee Amminadib. 13Chyndaa, chyndaa, O Shulamite chyndaa, chyndaa, dy vod mayd blâkey ort: cre hee-ys shiu ’sy Shulamite? myr cooidjaghey daa heshaght-chaggee.