CAB. VII

1Cre cha stoamey ta dty chassyn lesh braagyn, O inney reeoil! ta juntyn dty lheaystyn myr jewellyn, obbyr-lauee yn er-keirdee schleioil. 2Ta dty imleig myr saagh feeyney aalin as lane: ta dty volg myr dash dy churnaght, soit mygeayrt lesh lileeyn. 3Ta dty cheeaghyn myr cubbyl dy feeaïhee aegey ta nyn lannoonyn. 4Ta dty wannal myr toor ivory, dty hooillyn myr ny loghanyn eeastee ayns Heshbon, liorish giat Vath-rabbim: ta dty stroin myr toor Lebanon, ta jeeaghyn lesh Damascus. 5Ta dty chione myr Carmel, as ta folt dty ching myr ny atteeyn gorrym-jiarg, t’ayns ny shamyryn reeoil. 6O my ghraih, cre cha aalin as t’ou, cre cha eunyssagh ayns maynrys dty ghraih! 7T’ou jeeragh thollee myr y villey-palm, as dty cheeaghyn myr dhossanyn palmey. 8Dooyrt mee, Hem seose er y villey-palm, neem’s greimmey ny banglaneyn eck: bee dty cheeaghyn nish myrgeddin myr dhossanyn yn villey-feeyney, as soar millish dty ennal myr ooylyn, 9As glare dty veeal myr y feeyn share, son my ghraih, ta goll sheese dy blaystal, cur er ny meillyn cadlagh dy loayrt.

10Ta mish lesh my ghraih, as orrym’s ta e chree’s soit. 11Tar mârym, my ghraih, lhig dooin goll magh gys y vagher: lhig dooin aaght y ghoaill ayns ny baljyn-cheerey. 12Lhig dooin ve dy moghey er nyn gosh ayns ny garaghyn-feeyney, dy akin vel y billey-feeyney blaaghey, vel yn berrish-feeyney meiygh fosley, as ny pomegranateyn cur magh nyn mlaa: shen y raad yiow slane soylley my ghraih. 13Ta ny mandrakeyn cur soar millish, as ayns nyn dashtaghyn ta messyn jeh dy chooilley ghooghys, shenn as noa, ta mee er hashtey dty chour’s, O my ghraih.