CAB. I

1Paul sharvaant Yee, as ostyl Yeesey Creest, son credjue cloan reiht Yee, as goaill-rish yn irriney, ta cordail rish craueeaght: 2Ayns treishteil jeh’n vea veayn, ren Jee nagh vod breg y insh, gialdyn roish my row’n seihll er ny chroo; 3Agh t’eh ayns imbaghyn cooie er hoilshaghey e ghoo trooid preacheil [y tushtal,] y’er ny choyrt er my churrym, cordail rish sarey Yee nyn Saualtagh: 4Gys Titus my Vac hene lurg y chredjue cadjin: Grayse, myghin, as shee voish Jee nyn Ayr, as y Chiarn Yeesey Creest nyn Saualtagh. 5Son yn oyr shoh daag mee oo ayns Crete, dy chiartaghey ny reddyn ta ergooyl, as dy phointeil shirveishee ayns dagh ard-valley, myr doardee mee dhyt. 6Lheid as ta gyn foill, sheshey un ven, as e chloan crauee, nagh vel er ny chassid jeh rouanys ny mee-reiltys. 7Son shegin da aspick ve gyn foill, myr stiurt Yee; cha nee mooaralagh, ny leah fargagh, cha nee cur rish feeyn, ny builltagh, ny soit er cosney scammyltagh; 8Agh arryltagh dy choyrt oltaghey-bea, carrey da deiney mie, soccaragh, cairagh, crauee, sheelt; 9Cummal shickyr yn goo firrinagh, myr te er ve ynsit da, dy vod eh ve abyl liorish ynsagh fondagh, chammah dy choyrlaghey as dy choyrt nyn dhost adsyn ta loayrt noi’n chredjue. 10Son ta ayn ymmodee mee-reiltee, branlaadee, as molteyryn, erskyn ooilley adsyn ta jeh’n ghiarey-chymmylt: 11Ny beïll oc shegin y yeigh, ta cur slane lughtyn-thie fo-my-cheilley, gynsaghey reddyn nagh lhisagh ad er graih drogh chosney. 12Dooyrt fer jeh ny fir-ynsee oc hene, Va ny Cretianee rieau nyn mreageryn, broutyn, beishtagh, gluttyryn litcheragh. 13Ta’n feanish shoh firrinagh, shen-y-fa cur oghsan gyere daue dy vod ad ve shickyr ’sy chredjue. 14Nagh der ad geill da skeeallyn Hewagh, as oardaghyn deiney, ta chyndaa veih’n ynrickys. 15Dauesyn ta glen ta dy chooilley nhee glen, agh dauesyn ta neu-ghlen, as mee-chredjuagh, cha vel nhee erbee glen; agh ta eer nyn aigney as nyn gooinsheanse neu-ghlen. 16T’ad goaill orroo dy vel tushtey oc dy Yee; agh ayns nyn obbraghyn t’ad gobbal eh, feohdoil as mee-viallagh, as noi dy chooilley obbyr vie er nyn greoghey.