CAB. II

1Agh loayr uss ny reddyn ta cordail rish ynsagh slayntoil: 2Dy bee ny shenn gheiney fudagh, soccaragh, sheelt, fondagh ’sy chredjue, ayns giastyllys, ayns meenid: 3Ny shenn vraane myrgeddin, dy bee ad dy ymmyrkey-bea crauee, cha nee scammyltee, ny cur rouyr saynt da feeyn, soilshaghey sampleyr mie; 4Gynsaghey ny mraane saa dy ve sheelt, dy ve graihagh er nyn sheshaghyn poost, dy choyrt graih da nyn gloan, 5Dy ve tastagh, glen-aignagh, freayll ec y thie, dy ve dooie, biallagh da ny sheshaghyn oc hene, nagh bee goo Yee loayrit dy olk jeh. 6Coyrlee ny deiney aegey myrgeddin dy ve sheelt-aignagh. 7Ayns dy chooilley nhee jeeaghyn oo hene sampleyr dy obbraghyn mie: ayns ynsagh soilshaghey magh firrinys y chredjue, craueeaght, ynrickys, 8Glare breeoil nagh vod ve loayrit n’oï: dy vod eshyn ta shassoo magh nearey ’ghoaill, gyn veg yn olk echey dy choyrt gys nyn lieh. 9Coyrlee sharvaantyn dy ve biallagh da nyn mainshteryn hene, as dy wooiys ad dy mie ayns dy chooilley nhee; cha nee perkinagh, 10Cha nee myngyraght, agh soilshaghey slane jeidjys firrinagh; dy vod ad soiaghey magh ynsagh Yee nyn Saualtagh ayns dy chooilley nhee. 11Son ta grayse Yee er ny hoilshaghey, ta chebbal saualtys da dy chooilley ghooinney; 12Gynsaghey dooin, liorish gobbal mee-chraueeaght as yeearreeyn seihltagh, dy lhisagh shin baghey dy sheelt, dy cairal, as dy crauee ayns y theihll shoh; 13Farkiagh son y treishteil bannit shen, as cheet gloyroil yn Jee mooar, as nyn Saualtagh Yeesey Creest: 14Hug eh-hene er nyn son, dy voddagh eh shin y eaysley veih dy chooilley vee-chraueeaght, as casherickey da hene pobble reiht, jeean ayns obbraghyn mie. 15Ny reddyn shoh jean uss loayrt as coyrlaghey, as cur oghsan lesh slane ’torrity. Ny lhig da dooinney erbee beg y hoiaghey jeed.