CAB. III

1Cur ad ayns cooinaghtyn dy ve biallagh gys ard-reiltee as pooaraghyn, dy ve ammyssagh da fir-oik, dy ve arryltagh gys dy chooilley obbyr vie, 2Nagh loayr ad olk jeh dooinney erbee, dy ve sheeoil, imlee, soilshaghey dy chooilley veenid da dagh unnane. 3Son va shin hene myrgeddin keayrt dy row mee-hushtagh, mee-viallagh, ayns marranys, fo reill ymmodee yeearreeyn as eunyssyn peccoil, baghey ayns goanlys as roon, dwoaiagh, as coyrt dwoaie yn derrey yeh da’n jeh elley. 4Agh erreish da kenjallys as graih Yee nyn Saualtagh gys deiney v’er ny hoilshaghey, 5Cha nee liorish obbraghyn dy chairys, ta shin er n’yannoo, agh cordail rish e vyghin t’eh er hauail shin liorish niee yn aa-ghiennaghtyn [ayns bashtey], as jannoo shin ass-y-noa liorish y Spyrryd Noo; 6Shen t’eh dy palchey er gheayrtey orrin trooid Yeesey Creest nyn Saualtagh: 7Er ny heyrey liorish e ghrayse, dy voddagh shin ve jeant nyn eiraghyn cordail rish treishteil yn vea veayn. 8Shoh raa firrinagh, as ny reddyn shoh saillym oo kinjagh dy hionney orroo, dy vod adsyn ta er chredjal ayns Jee, ve kiaralagh dy hoilshaghey magh obbraghyn mie: ta ny reddyn shoh mie as vondeishagh da deiney. 9Agh shaghyn questionyn ommijagh mychione sheelogheyn, as anvea, as streeu mysh y leigh; son t’ad neu-vondeishagh, as fardail. 10Dooinney ta jannoo boiraghyn ’syn agglish, lurg raaue v’er ny choyrt da yn nah cheayrt, lhig da ve giarit magh: 11Toiggal dy vel y lheid fo shaghrynys as peccah, liorish hene er ny gheyrey. 12Tra ver-yms hood Artemas ny Tychicus, ny lhig shaghey dy heet hym gys Nicopolis, son ta foym dy cheau yn geurey ayns shen. 13Gow kiarail dy choyrt Zenas yn leighder, as Apollos er nyn yurnah, nagh bee ad ayns feme jeh nhee erbee. 14As lhig da’n vooinjer ainyn myrgeddin gynsaghey dy choyrt rish obbraghyn mie son ymmydyn ymmyrchagh, nagh bee ad neu-vessoil. 15T’adsyn ooilley ta mârym coyrt nyn mannaght hood. Cur nyn mannaght hucsyn ta graihagh orrin ayns y chredjue. Grayse dy row mêriu ooilley. Amen.