CAB. X

1Guee-jee gys y Chiarn son fliaghey ayns traa fliaghey s’jerree ny bleeaney, myr shen nee yn Chiarn bodjallyn sollys, as ver eh daue frassyn fliaghee, da dagh unnane faiyr ayns e vagher. 2Son ta ny jallooyn er loayrt fardalys, as ny fir-obbee er vakin breg, as t’ad er n’insh dreamallyn foalsey: t’ad gerjaghey ayns fardail: shen-y-fa hie ad rhymboo myr shioltane, v’ad seaghnit, er-yn-oyr nagh row bochilley erbee harrystoo. 3Va my chorree er ny vrasnaghey noi ny bochillyn, as ren mee kerraghey ny goair, son ta Chiarn my flaunyssee er yeeaghyn er e hioltane, thie Yudah, as t’eh er n’yannoo ad myr yn niagh trean ’sy chaggey. 4Magh veihsyn haink yn chorneil, veihsyn haink yn treiney, veihsyn yn bow-chaggee, veihsyn dagh tranlaasagh dy cheilley.

5As bee ad myr deiney niartal, ta stampey sheese nyn noidyn ’sy chaggey myr laagh ny straïdyn, as nee ad caggey, son dy vel y Chiarn ass nyn lieh, as bee ny markee er cabbil nyn haart. 6As neem’s thie Yudah y niartaghey, as saue-yms thie Yoseph, as ver-ym lhiam reesht ad gys nyn ynnyd hene; son ta myghin aym orroo: as bee ad myr nagh beign er n’yiooldey voym ad: son ta mish yn Chiarn y Jee oc, as eaisht-ym roo. 7As bee cloan Ephraim myr dooinney niartal, as gowee yn cree oc boggey myr lesh feeyn: dy jarroo hee yn chloan oc eh, as bee ad gennal, as gowee yn cree oc boggey ayns y Chiarn. 8Ver-ym eam daue, as chaglee-ym ad dy cheilley, son ta mee er chosney reesht ad: as nee ad bishaghey myr t’ad er vishaghey. 9Son spreih-ym ad mastey yn pobble: as cooinee ad orrym ayns cheeraghyn joarree, as nee ad beaghey marish nyn gloan, as chyndaa reesht. 10Ver-ym lhiam reesht ad myrgeddin ass cheer Egypt, as chymsee-ym ad ass Assyria, as ver-ym lhiam ad gys cheer Ghilead as Lebanon, as cha bee eh dy liooar daue. 11As hed eh trooid yn aarkey lesh seaghyn, as bwoaillee eh tonnyn ny marrey, as nee ooilley diunidyn yn awin chyrmagh: as bee moyrn Assyria er ny injillaghey, as bee lorg-reill Egypt er ny scughey. 12As neem’s ad y niartaghey ayns y Chiarn, as nee ad shooyl noon as noal ayns e ennym, ta’n Chiarn dy ghra.