CAB. XI

1Foshil dty ghorryssyn, O Lebanon, dy vod yn aile ny cedaryn ayd’s y stroie. 2Jean gullal, O villey-juys, son ta’n cedar er duittym; son dy vel ny niartallee er ny spooilley: gull-jee, O shiuish viljyn-darragh Vashan, son ta’n cheyll-feeyney er ny lhieggal.

3Ta coraa treihys ny bochillyn er ny chlashtyn: son ta’n ghloyr oc er ny spooilley: coraa dy vuirroogh ny lionyn aegey; son ta moyrn Yordan er ny spooilley. 4Myr shoh ta’n Chiarn my Yee dy ghra, Fassee-jee yn chioltane son y skynn. 5T’adsyn my-lhieu ad dy varroo ad, as cha vel ad coontey ad-hene oolee: as t’adsyn ta creck ad, gra, Bannit dy row yn Chiarn, son ta mee berchagh: son cha vel erreeish ec ny bochillyn oc hene orroo. 6Son cha bee’m chymmoil ny-sodjey da cummaltee yn cheer, ta’n Chiarn dy ghra: son cur-my-ner, livrey-yms ny deiney dagh unnane gys laue e naboo, as gys laue e ree, as bwoaillee adsyn y cheer, as cha livrey-ym ad ass nyn laue. 7As fassee-ym shioltane y toyrt-mow, eer shiuish, O reyggyryn treih yn chioltane; as ghow mee daa lorg; yn derrey yeh denmys mee Aalid, as y jeh elley denmys mee Kianglaghyn, as ren mee fassaghey yn chioltane. 8Yiare mee jeh three bochillyn myrgeddin ’syn un vee, as v’adsyn dwoaie my annym’s, as va mish myrgeddin dwoaie yn annym ocsyn. 9Eisht dooyrt mee, Cha goym kiarail sodjey jeu: shen ta geddyn baase, lhig da goll gy-baase: as shen ta dy ve giarit jeh, lhig da ve giarit jeh; as lhig da’n chooid elley gee, dagh unnane feill y cheilley.

10As ghow mee my lorg, eer Aalid, as yiare mee ayns jees eh, dy rassey my chonaant va mee er n’yannoo rish ooilley yn pobble. 11As ve brisht er y laa shen: myr shen hoig reyggyryn treih yn chioltane, ren farkiaght orrym, dy nee goo yn Chiarn ve. 12As dooyrt mee roo, My she yn aigney eu eh, cur-jee my leagh dou: as mannagh nee, ny cur-jee: as veihee ad son my phrice jeih peeshyn as feed dy argid. 13As dooyrt y Chiarn rhym, Ceau eh gys y phasheyder: price lowal dy jarroo hug ad orrym! As ghow mee ny jeih peeshyn as feed dy argid, as cheau mee ad gys y phasheyder ayns thie yn Chiarn. 14Eisht yiare mee my lorg elley, eer Kianglaghyn, dy vrishey yn chaardys ta eddyr Judah as Israel. 15As dooyrt y Chiarn rhym, Gow hood greïnyn yn vochill ommijagh. 16Son cur-my-ner, trog-yms seose bochilley ayns y cheer, nagh jean jeeaghyn lurg ny [kirree] cailjey, chamoo shirrey son yn eayn, ny lheihys adsyn ta doghanit, ny gymmyrkey lesh shen ta er-troggloo: agh ee-ys eh feill ny roauyree, as raipee eh ny yngnyn oc ayns peeshyn. 17Smerg da’n bochilley liastey, ta treigeil e hioltane! bee yn cliwe er e roih, as er e hooill yesh: nee yn roih echey fargagh, as bee’n sooill yesh echey doo dorraghey.