CAB. XII

1Phadeyrys trome goo yn Chiarn son Israel, ta’n Chiarn dy ghra, ta sheeyney magh ny niaughyn, as layal undin ny hooirey, as kiaddey spyrryd dooinney cheu-sthie jeh. 2Cur-my-ner, neem’s Jerusalem ny chappan pyshoonagh da ooilley yn pobble cruin mygeayrt, tra vees ad ’sy chionney-stiagh, chammah noi Judah as noi Jerusalem.

3As ayns y laa shen neem’s Jerusalem clagh hrome son dy chooilley phobble: bee dagh unnane ta laadey eh-hene lh’ee er ny vroo gys peeshyn, ga dy bee ooilley pobble ny hooirey er nyn jaglym cooidjagh noi eck. 4Ayns y laa shen, ta’n Chiarn dy ghra, bwoaill-ym dy chooilley chabbyl lesh atchim, as yn markiaght lesh keoïd, as foshil-ym my hooillyn er thie Yudah, as bwoaill-ym ooilley cabbil ny ashoonee lesh dellid. 5As nee kiannoortyn Yudah gra ayns nyn gree, Bee cummaltee Yerusalem my niart ayns Chiarn ny flaunyssee yn Jee oc. 6Ayns y laa shen neem’s kiannoortyn Yudah goll-rish chiollagh dy aile mastey’n fuygh, as myr brasnag aile ayns bunney arroo: as nee ad stroie ny ashoonee ooilley mygeayrt, er y laue yesh, as er y laue chiare: as bee cummaltee ayns Jerusalem reesht, ayns y voayl eck hene, eer ayns Jerusalem. 7As nee yn Chiarn myrgeddin sauail cabbaneyn Yudah hoshiaght, nagh jean gloyr thie Ghavid, ny gloyr cummaltee Yerusalem, mooadaghey ad-hene noi Judah. 8Nee’n Chiarn ayns y laa shen fendeil cummaltee Yerusalem: as bee eshyn ta faase ny-vud oc ’sy laa shen goll-rish David; as bee thie Ghavid goll-rish Jee, as myr ainle y Chiarn goll rhymboo.

9As hig eh gy-kione ayns y laa shen, dy beem’s er-chee dy stroie ooilley ny ashoonee hig noi Jerusalem. 10As neem’s deayrtey er thie Ghavid, as er cummaltee Yerusalem, spyrryd dy ghrayse as dy phadjeryn, as nee ad jeeaghyn orrym’s t’ad er hoylley, as nee ad dobberan er e hon, myr ta dooinney dobberan son e vac ynrycan, as bee ad ayns sherriuid er e hon, myr dooinney ta ayns sherriuid son e vac shinney. 11As bee ayns y laa shen dobberan mooar ayns Jerusalem, myr dobberan Hadadrimmon ayns coan Vegiddon. 12As nee’n cheer dobberan, dagh lught-thie er-lheh, kynney lught-thie Ghavid er-lheh, as ny mraane oc er-lheh: lught-thie Nathan er-lheh, as ny mraane oc er-lheh: 13Lught-thie Levi er-lheh, as ny mraane oc er-lheh: lught-thie Shimei er-lheh, as ny mraane oc er-lheh: 14Dy chooilley lught-thie t’er-mayrn, dagh lught-thie orroo hene, as ny mraane oc orroo hene.