CAB. II

1Hrog mee my hooillyn reesht, as yeeagh mee; as cur-my-ner, dooinney lesh line towshan ny laue. 2Eisht dooyrt mee, Cre’n raad t’ou goll? As dooyrt eh rhym, Dy ghoaill towshan Yerusalem, dy akin cre ta’n lheead echey, as cre ta’n lhiurid echey. 3As cur-my-ner, hie yn ainle va taggloo rhym magh, as hie ainle elley magh ny whail. 4As dooyrt eh rish, Roie, loayr rish yn dooinney aeg shoh, gra, Bee cummaltee ayns Jerusalem myr ayns baljyn gyn voallaghyn son ymmodee ny deiney, as yn ollagh t’ayn. 5Son beem’s jeeish, ta’n Chiarn dy ghra, voalley dy aile ooilley mygeayrt, as beem’s yn ghloyr ayns y vean eck.

6Ho, ho, tar-jee magh, as chea-jee veih cheer y twoaie, ta’n Chiarn dy ghra: son ta mee er skeayley shiu co-lhean rish kiare geayghyn yn aer, ta’n Chiarn dy ghra. 7Livrey oo hene, O Zion, ta cummal marish inneen Vabylon. 8Son myr shoh ta Chiarn ny flaunyssee dy ghra, Ta Jee ny ghloyr er my choyrt noi ny ashoonee ren shiuish y spooilley, son eshyn vennys riuish, t’eh bentyn rish clagh y thooill echeysyn. 9Son cur-my-ner crie-ym my laue orroo, as bee ad son spooilley da nyn sharvaantyn, as bee fys eu, dy vel Chiarn ny flaunyssee er my choyrt.

10Gow arrane, as bee gennal, O inneen Zion: son cur-my-ner, ta mee cheet, as nee’m cummal ayns y vean ayd’s, ta’n Chiarn dy ghra. 11As bee ymmodee ashoonee ayns y laa shen er ny lhiantyn gys y Chiarn, as bee ad my phobble: as neem’s cummal ayns y vean ayd’s, as bee fys ayd, dy vel Chiarn ny flaunyssee er my choyrt hood’s. 12As nee yn Chiarn goaill huggey hene myr eiraght Judah e chronney ayns y thalloo sheaynt, as gow ee eh reesht Jerusalem myr reih. 13Lhig da ooilley sheelnaue ve nyn dhost kiongoyrt rish y Chiarn: son t’eh er hroggal seose eh-hene ayns e ynnyd casherick.