CAB. III

1As yeeagh eh dooys Joshua yn ard-saggyrt, ny hassoo fenish ainle y Chiarn, as Satan shassoo ec e laue yesh, dy chur eddin da. 2As dooyrt y Chiarn rish Satan, Dy der y Chiarn oghsan dhyt’s, O Satan, eer y Chiarn ta er reih Jerusalem, dy der eshyn oghsan dhyt’s: nagh vel eh shoh stoo cosnit ass yn aile? 3Nish va Joshua coamrit lesh eaddagh broghe-frytlagh, as hass eh fenish yn ainle. 4As dreggyr eh, as loayr eh roosyn va nyn shassoo ny enish, gra, Gow-jee jeh yn eaddagh broghe-frytlagh. As rish hene, dooyrt eh, Cur-my-ner, ta mee er ghoaill ersooyl dty pheccaghyn, as nee’m oo y choodaghey lesh caghlaa coamrey. 5As dooyrt mee, Lhig daue mitre aalin y chur er e chione: myr shen hug ad mitre aalin er e chione, as choamree ad eh lesh garmadyn, as hass ainle y Chiarn kionfenish. 6As hickyree ainle y Chiarn da Joshua, gra, 7Myr shoh ta Chiarn ny flaunyssee dy ghra, My nee uss gimmeeaght ayns my raaidyn, as my nee uss my churrym y reayll, eisht nee uss myrgeddin briwnys ayns my hie’s, as freayll my chooyrtyn, as ver-yms dhyt ynnydyn dy hooyl orroo mastey yn slane eanish. 8Clasht nish, O Yoshua, yn ard-saggyrt, uss as dty vraaraghyn ta soie kiongoyrt rhyt: son t’ad deiney yindyssagh: son cur-my-ner, ver-ym lhiam magh my harvaant yn BANGLANE. 9Son cur-my-ner, yn chlagh ta mee er layal roish Joshua: er yn un chlagh cheddin vees shiaght sooillyn, cur-my-ner, giare-yms yn cowrey er, ta Chiarn ny flaunyssee dy ghra, as goym’s ersooyl mee-chraueeaght yn cheer shen ayns un laa. 10Ayns y laa shen, ta Chiarn ny flaunyssee dy ghra, nee dagh dooinney e naboo y chuirrey fo’n villey-feeyney, as fo’n villey-figgagh.