CAB. IV

1As haink yn ainle, va taggloo rhym, yn nah cheayrt, as ghooisht eh mish, myr dooinney t’er ny ghoostey ass e chadley. 2As dooyrt eh rhym, Cre t’ou fakin? As dooyrt mee, Ta mee er yeeaghyn, as cur-my-ner cainlere slane airhey, as claare er e vullagh, as ny shiaght lampyn echey er, as shiaght lhiggaghyn gys ny shiaght lampyn va er e vullagh: 3As daa villey-olive liorish, billey er dagh cheu jeh’n chlaare. 4Myr shen dreggyr mee, as loayr mee rish yn ainle va taggloo rhym, gra, Cre t’ad shoh, my hiarn? 5As dansoor yn ainle va taggloo rhym, as dooyrt eh, Vel fys ayd’s cre t’ad shoh? As dansoor mee, Cha vel, my hiarn. 6As dreggyr eh, as loayr eh rhym, gra, Shoh goo yn Chiarn gys Zerubbabel, gra, Cha nee liorish niart ny pooar, agh liorish my spyrryd, ta Chiarn ny flaunyssee dy ghra. 7Quoi uss, O lieau mooar? roish Zerubbabel bee uss er dty yannoo rea, as nee eh soiaghey seose y chlagh-vullee er, lesh yllaghey, geam, Grayse, grayse dy row da. 8Ny-sodjey na shoh haink goo yn Chiarn hym’s, gra, 9Ta laueyn Zerubbabel er layal undin y thie shoh, ver ny laueyn echeysyn myrgeddin mullagh er; as bee fys ayd’s dy vel Chiarn ny flaunyssee er my choyrt hiuish. 10Son adsyn nagh row scansh oc jeh laa ny nheeghyn fardalagh, gowee ad boggey, tra ver ad my-ner yn level ayns laue Zerubbabel, marish y chiaght shen; adsyn sooillyn y Chiarn, ta roie noon as noal er feaï-ny-cruinney.

11Eisht dreggyr mee, as dooyrt mee rish, Cre’n daa villey-olive shoh t’er dagh cheu jeh’n chainlere? 12As dreggyr mee reesht, as dooyrt mee rish, Cre’n daa vanglane olive ad shoh, ta folmaghey yn ooil casherick trooid daa lhiggey airhey ayns y chlaare airhey? 13As dreggyr eh mee, as dooyrt eh, Nagh nhione dhyt, cre t’er ny hoiggal lioroo shoh? As dooyrt mee, Cha nhione, my hiarn. 14Eisht dooyrt eh, T’ad shoh yn daa fer-ooilit, ta nyn shassoo fenish Chiarn y slane seihll.