CAB. VI

1As hyndaa mee, as hrog mee seose my hooillyn, as yeeagh mee, as cur-my-ner, haink kiare fainee magh eddyr daa slieau, as va ny sleityn sleityn prashey. 2As ayns y chied ainagh va cabbil ruy, as ayns y nah ainagh va cabbil doo. 3As ayns y trass ainagh va cabbil bane, as ayns y chiarroo ainagh va cabbil glass as doyn. 4Eisht dreggyr mee, as dooyrt mee rish yn ainle va taggloo rhym, Cre t’er ny hoiggal lioroo shoh, my hiarn. 5As dreggyr yn ainle, as dooyrt eh rhym, T’ad shoh kiare geayghyn yn aer, ta goll magh veih fenish Chiarn y slane seihll. 6As ta ny cabbil doo t’ayn, goll magh gys y cheer-twoaie, as ta ny banee goll magh geiyrt orroo; as ta ny cabbil glassey goll magh gys y cheer-jiass. 7As hie ny cabbil doyn magh, as chiare ad dy gholl, as shooyl noon as noal trooid y theihll: as dooyrt eh, Reue-jee, as shooyl-jee noon as noal trooid y theihll. Myr shen hooyl ad noon as noal trooid y theihll. 8Eisht deïe eh orrym, as loayr eh rhym, gra, Cur-my-ner, t’ad shoh ta goll gys y cheer-twoaie er chiunaghey my spyrryd noi yn cheer-twoaie.

9As haink goo yn Chiarn hym’s, gra, 10Gow jeusyn jeh’n chappeeys, eer Heldai, Tobijah, as Jedaiah, t’er jeet voish Babylon, as tar uss yn laa cheddin, as immee gys thie Yosiah mac Zephaniah; 11Eisht gow argid as airh, as jean atteeyn, as soie ad er kione Yoshua, mac Yosedech, yn ard-saggyrt; 12As loayr uss rishyn, gra, Myr shoh ta Chiarn ny flaunyssee loayrt, gra, Cur-my-ner yn dooinney ta enmyssit yn BANGLANE, as aasee eh seose ass yn ynnyd echey, as troggee eh chiamble y Chiarn: 13Nee eshyn dy jarroo troggal chiamble y Chiarn, as gymmyrkey yn ghloyr echey, as nee eh soie as reill er e stoyl-reeoil, as bee eh ny haggyrt er y stoyl-reeoil echey, as bee coonceil y chee eddyr ad ny-neesht. 14As bee ny atteeyn son imraa da Helem, as Tobijah, as da Jedaiah, as da Hen, mac Zephaniah, ayns chiamble y Chiarn. 15As hig joarreeyn veih foddey, as troggee ad chiamble y Chiarn, as bee fys euish, dy vel Chiarn ny flaunyssee er my choyrt hiuish. As hig shoh gy-kione, my vees shiu imneagh dy chur biallys da coraa yn Chiarn y Jee eu.