CAB. VIII

1Reesht haink goo yn Chiarn ny flaunyssee hym’s, gra, 2Myr shoh ta Chiarn ny flaunyssee dy ghra, Va mish eadolagh son Zion lesh eadaghey jeean, as va mee geadaghey moee lesh jiarg-eulys. 3Myr shoh ta’n Chiarn dy ghra, Ta mee er hyndaa gys Zion, as nee’m cummal ayns mean Yerusalem, as bee Jerusalem enmyssit, Ard-valley yn ynrickys, as slieau Chiarn ny flaunyssee, Yn slieau casherick. 4Shoh myr ta Chiarn ny flaunyssee dy ghra, Nee shenn gheiney, as shenn vraane foast cummal ayns straïdyn Yerusalem, as dy chooilley ghooinney as lorg ny laue son eer eash. 5As bee straïdyn yn ard-valley lane dy ghuillyn as dy inneenyn cloie ayns ny straïdyn eck. 6Myr shoh ta Chiarn ny flaunyssee dy ghra, My vees eh red yindyssagh ayns sooillyn sluight y phobble shoh ayns ny laghyn shoh, vel shen oyr eh dy ve myrgeddin yindyssagh ayns my hooillyn’s? ta Chiarn ny flaunyssee dy ghra. 7Myr shoh ta Chiarn ny flaunyssee dy ghra, Cur-my-ner, saue-ym my phobble veih yn cheer-har, as veih yn cheer-heear, 8As ver-ym lhiam ad, as nee ad cummal ayns mean Yerusalem, as bee ad my phobble’s, as beem’s yn Jee ocsyn ayns firrinys as ynrickys.

9Myr shoh ta Chiarn ny flaunyssee dy ghra, Lhig da ny laueyn eu ve lajer, shiuish ta clashtyn ayns ny laghyn shoh ny goan shoh liorish beeal ny phadeyryn, v’ayns y laa va undin thie Chiarn ny flaunyssee layit son troggal y chiamble. 10Son roish ny laghyn shen cha row faill son dooinney, ny faill son baagh, chamoo va shee ny chour-syn hie magh ny haink stiagh, kyndagh rish yn anvea: son vrasnee mee dagh dooinney noi e naboo. 11As nish cha jean-yms gymmyrkey mee-hene da’n chooid elley jeh’n pobble shoh myr ’sy chenn earish, ta Chiarn ny flaunyssee dy ghra. 12Son bee yn sheel correy messoil, nee yn billey gymmyrkey mess, as ver y thalloo magh brat palchey, as ver ny niaughyn nyn ghruight, as ver-yms da fooilliagh yn phobble shoh ooilley ny reddyn shoh ayns nyn gummal. 13As hig eh gy-kione, myr va shiu mollaght mastey ny ashoonee, O hie Yudah, as hie Israel; myr shen nee’m shiuish y hauail, as bee shiu son bannaght: ny bee aggle erriu, agh lhig da ny laueyn eu ve lajer. 14Son myr shoh ta Chiarn ny flaunyssee dy ghra, Myr va mee kiarit dy cherraghey shiu, tra ren nyn ayraghyn mish y vrasnaghey gys corree, ta Chiarn ny flaunyssee dy ghra, as cha ren mee meiyghey; 15Myr shen reesht ta mee er chiarail ayns ny laghyn shoh, dy yannoo dy mie son Jerusalem as thie Yudah: ny bee aggle erriu.

16Shoh ny reddyn nee shiu jannoo, Loayr-jee dy chooilley ghooinney yn ynrickys rish e naboo: jean-jee briwnys yn ynrickys as shee y chooilleeney ayns nyn yiattyn. 17As ny lhig da veg j’iu smooinaghtyn olk ayns e chree noi e naboo, as ny cur-jee rish loo oaiagh erbee. Son t’ad ooilley shoh reddyn dwoaiagh dooys, ta’n Chiarn dy ghra.

18As haink goo Chiarn ny flaunyssee hym’s, gra, 19Myr shoh ta Chiarn ny flaunyssee loayrt, Bee trostey yn chiarroo vee, as trostey yn wheiggoo, as trostey yn chiaghtoo, as trostey yn jeihoo vee son thie Yudah boggey as gennallys, as feaillaghyn eunyssagh; Shen-y-fa cur-jee graih da ynrickys as shee. 20Myr shoh ta Chiarn ny flaunyssee dy ghra, Hig eh foast gy-kione, dy jig pobble as cummaltee ymmodee ard-valjyn. 21As hig cummaltee un ard-valley gys ard-valley elley, gra, Lhig dooin goll dy tappee dy ghoaill padjer kiongoyrt rish y Chiarn, as dy hirrey Chiarn ny flaunyssee: hem’s myrgeddin. 22Dy jarroo, hig ymmodee pobble as ashoonyn niartal dy hirrey gys Chiarn ny flaunyssee ayns Jerusalem, as dy ghoaill padjer kiongoyrt rish y Chiarn. 23Myr shoh ta Chiarn ny flaunyssee dy ghra, Ayns ny laghyn shen hig eh gy-kione, dy jean jeih deiney ass dy chooilley ghlare jeh ny ashoonee greme y ghoaill, eer greme er yn rumbyl echeysyn ta ny Hew, gra, Hed mayd mêriu: son ta shin er chlashtyn dy vel Jee mêriuish.