CAB. IX

1Phadeyrys trome goo yn Chiarn noi cheer Hadrach, as er Damascus nee eh tannaghtyn: tra vees sooillyn dooinney, myr jeh ooilley sheelogheyn Israel er ny hyndaa gys y Chiarn. 2As noi Hamath t’er y chagliagh oc; noi Tyrus as Zidon my s’creeney ad. 3As hrog Tyrus jee hene cashtal lajer, as hasht ee seose argid myr y joan, as airh ghlen myr laagh ny straïdyn. 4Cur-my-ner nee yn Chiarn geiyrt ee magh, as bwoaillee eh yn phooar eck ayns yn aarkey, as bee ish er ny stroie lesh aile. 5As nee Ashkelon fakin shoh, as aggle y ghoaill; as hee Gaza eh neesht, as bee eh feer trimshagh, as myrgeddin Ekron: son bee’n jerkal eck ayns fardail, as nee yn ree cherraghtyn veih Gaza, as bee Ashkelon gyn cummaltee. 6As nee joarree cummal ayns Ashdod, as giare-ym jeh moyrn ny Philistinee. 7As goym ersooyl yn uill echey ass e veeal, as e eajeeys veih eddyr e eeacklyn: agh eshyn t’er-mayrn, eer eshyn vees lesh y Jee ain, as bee eh myr kiannoort ayns Judah, as bee Ekron myr y Jebusite. 8As nee’m campal mygeayrt my hie lesh sheshaght-caggee, dy endeil eshyn ta cheet as goll huggey as veih: as cha jig tranlaasagh erbee ny hrooid oc arragh: son ta mee nish er yeeaghyn orroo lesh my hooillyn.

9Gow boggey mooar, O inneen Zion: trog seose dty choraa, O inneen Yerusalem: cur-my-ner, ta dty ree cheet hood: t’eh ynrick, ta saualtys echey, t’eh imlee, as markiaght er assyl, as er lhiy sharragh yn assyl. 10As giare-ym jeh yn ainagh voish Ephraim, as y cabbyl veih Jerusalem, as bee’n bow-chaggee er ny vrishey, as loayree eh shee rish ny ashoonee: as bee yn reeriaght eer veih keayn gys keayn, as veih yn awin gys ardjyn sodjey magh y thallooin. 11As er dty hon’s myrgeddin, liorish fuill dty chonaant, ta mee er choyrt reamys da dty phryssoonee ass yn ooig, ayn nagh vel veg yn ushtey.

12Chyndaa-jee gys yn chashtal lajer, shiuish phryssoonee dy hreishteil, eer er y laa shoh, ta mee dy hickyraghey, dy jean-ym cooilleeney dooble dhyt. 13Tra ta mee er lhoobey Judah er my hon, er lhieeney’n vhow lesh Ephraim, as er hroggal seose ny mec ayd’s, O Zion, noi dty vec’s, O Ghreece, as er n’yannoo oo myr cliwe yn treanagh: 14As bee yn Chiarn ry-akin harrystoo, as hig e hide magh myr tendreil: as nee yn Chiarn Jee yn trumpet y heidey, as hed eh magh lesh geayghyn-cassee yn jiass. 15Nee Chiarn ny flaunyssee ad y endeil, as nee ad stroie, as yiow ad yn varriaght lesh claghyn-sling, as iu-ee ad, as nee ad feiyr myr lesh feeyn, as bee ad er ny lhieeney myr siyn, as myr corneilyn yn altar. 16As saue-ee yn Chiarn nyn Yee ad ayns y laa shen myr shioltane e phobble, son bee ad myr claghyn attey, er ny hroggal seose myr cowrey-caggee er y cheer echey. 17Son cre wheesh as ta e vieys, as cre wheesh as ta e aalid! nee arroo ny deiney aegey y yannoo gennal, as feeyn noa ny mraane aegey.