CAB. I

1Goo yn Chiarn haink gys Zephaniah mac Chushi, mac Ghedaliah, mac Amariah, mac Hizkiah, rish lhing Yosiah, mac Amon, ree Yudah. 2Neem’s dy bollagh stroie dy chooilley nhee veih’n thalloo, ta’n Chiarn dy ghra. 3Stroie-yms dooinney as baagh: Stroie-yms eeanlee yn aer, as eeastyn ny marrey, as ceabyn snapperal ny mee-chrauee, as giare-yms jeh dooinney veih eaghtyr y thallooin, ta’n Chiarn dy ghra. 4As sheeyn-yms magh myrgeddin my laue er Judah, as er ooilley cummaltee Yerusalem, as giare-yms jeh fooilliagh Vaal veih’n ynnyd shoh, as ennym ny Chemarim, marish ny saggyrtyn; 5As adsyn ta cur ooashley da sheshaght rollageagh yn aer, er mullagh ny thieyn, as adsyn ta ooashlaghey, as breearrey liorish y Chiarn, as breearrey liorish Malcham; 6As adsyn ta er chur cooyl rish y Chiarn, as adsyn nagh ren shirrey huggey, ny briaght er e hon. 7Bee dty host ec fenish y Chiarn Jee: son ta laa yn Chiarn er-gerrey: son ta’n Chiarn er n’aarlagh oural, t’eh er chuirrey e ghoaldee. 8As hig eh gy-kione, ayns laa oural y Chiarn, dy jean-yms kerraghey ny princeyn, as cloan y ree, as adsyn ooilley ta coamrit lesh eaddagh joarree. 9Ayns y laa cheddin neem’s kerraghey adsyn ooilley ta lheim harrish sole y dorrys, ta lhieeney thie nyn mainshtyr lesh mee-chairys as molteyrys. 10As hig eh gy-kione ayns y laa shen, ta’n Chiarn dy ghra, dy bee yllaghey dy cheayney veih giat ny eeastee, as gullal veih yn nah yiat, as tharmane vooar veih ny croink. 11Yllee-jee, shiuish chummaltee Vaktesh, son ta ooilley ny marchanyn giarit sheese: t’adsyn ooilley va dellal ayns argid giarit jeh. 12As hig eh gy-kione ec y traa shen, dy jean-yms ronsagh Jerusalem lesh cainleyn, as kerraghey ny deiney t’ec fea er nyn ghrundin; ta gra ayns nyn gree, Cha jean y Chiarn mie ny sie. 13Shen-y-fa hig yn chooid oc dy ve son spooilley, as ny thieyn oc nyn dholtanyn: nee ad myrgeddin thieyn y hroggal, agh cha jean ad cummal ayndoo: as nee ad garaghyn-feeyney y hoiaghey, agh jeh’n feeyn oc cha jean ad giu. 14Ta laa mooar y Chiarn er-gerrey, as cheet feer siyragh, dy jarroo coraa laa yn Chiarn: nee yn dooinney niartal keayney ayns shen dy sharroo. 15Ta’n laa shen, laa dy yymmoose, laa dy hrimshey, as dy arkys, laa dy hraartys as toyrt-mow, laa dy ghorraghys as dy ghrooid, laa dy vodjallyn as dorraghys dullyr, 16Laa da’n trumpet as larm-caggee, noi ny ard-valjyn voallit, as noi ny tooryn ard. 17As ver-ym lhiam seaghyn er deiney, dy jean ad shooyl myr deiney doal, er-yn-oyr dy vel ad er n’yannoo peccah noi yn Chiarn: as bee yn uill oc deayrtit magh myr joan, as yn eill oc myr gaerr. 18Chamoo oddys yn argid, ny yn airh oc sauail ad ayns laa jymmoose y Chiarn, agh bee yn slane cheer er ny choyrt mow lesh aile yn eadolys echey: son nee eh dy jarroo, dy leah geddyn rea rish ooilley cummaltee yn cheer.